Нәнси пелоси дунядики рәһбәрләрни 2022-йиллиқ қишлиқ олимпек мусабиқисини байқут қилишқа чақирған

Мухбиримиз җәвлан
2021.05.19

Америка дөләт мәҗлиси авам палатасиниң баянатчиси нәнси пелоси сәйшәнбә күни (18-май) дөләт мәҗлисиниң испат аңлаш йиғинида дунядики һәр қайси дөләт рәһбәрлирини келәр йил 2-айда хитайда өткүзүлидиған қишлиқ олимпек мусабиқисиға қатнашмаслиқи керәкликини билдүргән. У сөзидә хитайниң кишилик һоқуқ дәпсәндичиликини, шундақла хитай тәрәптә туруп өзиниң әхлақий нопузини йоқатқан рәһбәрләрни әйибләп, дуня рәһбәрлирини 2022-йил хитайда өткүзүлидиған қишлиқ олимпек мусабиқисини байқут қилишқа чақирған.

У мундақ дегән: “һәр қайси дөләт рәһбәрлири хитайни зиярәт қилиш арқилиқ хитай һөкүмитигә болған һөрмитини билдүрмисиму болиду. Бу рәһбәрләр ирқий қирғинчилиқ давам қиливатқан әһвалда хитайға берип у йәрдә олтурса, шундақ бир мәсилигә дуч келиду: дуняниң нәридә болсиңиз болуң, сиз қайси әхлақ нопозиңиз билән кишилик һоқуқ һәққидә гәп қилалайсиз?”

Ройтрес агентлиқиниң бу хәвиридә ейтилишичә, җов байден һөкүмити бейҗиңдики олимпек мусабиқисиға қатнишиш-қатнашмаслиқ мәсилисидә иттипақдашлири билән мәслиһәтлишидиғанлиқини билдүргән болуп, нәнси пелосиниң бу сөзидин кейин бир һөкүмәт әмәлдари байден һөкүмитиниң юқириқи мәйданиниң өзгәрмигәнликини билдүргән.

Хитай һөкүмити нәнси пелосиниң бу баянатидин қаттиқ ғәзәбләнгән болуп, хитай баянатчиси җав лиҗйән 19-май күни баянат берип, американиң тәнтәрбийәни сиясий оюнға айландурватқанлиқини әйблигән һәмдә “америкадики бәзи шәхсләрниң сөзлири ялғанчилиқ вә сахта учурға толған,” дәп чалвақиған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.