Америка авам палата рәиси нәнси пелоси тәйвәндә өркәш дөләт билән көрүшкән

Мухбиримиз җәвлан
2022.08.03

Америка авам палатаси рәиси нәнси пелоси ханим хитайниң көп қетимлиқ тәһдитлиригә қаримай, 8-айниң 2-күни тәйвәнгә чүшүп өткән вә өзиниң күнтәртипидики бу муһим зияритини башлиған. Нәнси пелосиниң бу қетим тәйвәнни зиярәт қилиши, 25 йилдин буян американиң әң юқири дәриҗилик рәһбәрлириниң тәйвәнни зиярәт қилиши һесаблинидикән.

Нәнси пелоси ханим тәйвәнгә йетип барғандин кейин муһим баянат елан қилип, американиң тәйвәндики демократийә вә әркинликни қоғдайдиғанлиқини, мустәбит күчләрниң тәһдити вә зулумиға учраватқан хәлқләргә яр-йөләк болидиғанлиқини билдүргән. У тәйвән президенти сәй йиңвен қатарлиқ дөләт әрбаблири билән көрүшкәндин башқа, йәнә тәйвәндики һәр саһә затлири, кишилик һоқуқ қоғдиғучилири вә паалийәтчиләр билән көрүшкән; шу қатарда тәйвән парламенти кишилик һоқуқ комитетиниң баш катипи, 1989-йилдики тйәнәнмеин оқуғучилар һәрикитиниң йетәкчилиридин бири болған өркәш дөләт билән көрүшүп, һәр қандақ йәрдә, һәр қандақ сорунда уйғурларниң йенида туридиғанлиқини тәкитлигән.

Нәнси пелоси ханим 8-айниң 3-күни йоллиған тиветида тәйвәндики демократик затлар билән көрүшкәнлики һәққидә учур берип мундақ дегән: “бүгүн вәкилләр өмикимиз тәйвәндики сабиқ сиясий җинайәтчиләр билән бирликтә ‛нати кишилик һоқуқ музейи‚ ни зиярәт қилди. Андин биз аммиви тәшкилат рәһбәрлириниң кишилик һоқуқ доклатини аңлидуқ вә уларниң җасаритидин илһам алдуқ”.

Нәнси пелоси хеним тәйвәнни зиярәт қилиштин бир нәччә күн бурун өркәш дөләт өзиниң тивиттер һесабида мундақ дәп язған: “шундақ җәзмләштүрүшкә болидуки, америка һөкүмити коммунист хитайға нәччә он йил муҗимәл сиясәт йүргүзүп кәлгәниди, нәнси пелосиниң тәйвән зиярити буниңға хатимә бериду. Йәнә шундақ дейишкә болидуки, американиң хитай сияситиниң өзгириши билән, дуняда йипйеңи вәзийәт барлиққа келиду”.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.