Amérika awam palata re'isi nensi pélosi teywende örkesh dölet bilen körüshken

Muxbirimiz jewlan
2022.08.03
Share on WhatsApp
Share on WhatsApp

Amérika awam palatasi re'isi nensi pélosi xanim xitayning köp qétimliq tehditlirige qarimay, 8-ayning 2-küni teywen'ge chüshüp ötken we özining küntertipidiki bu muhim ziyaritini bashlighan. Nensi pélosining bu qétim teywenni ziyaret qilishi, 25 yildin buyan amérikaning eng yuqiri derijilik rehberlirining teywenni ziyaret qilishi hésablinidiken.

Nensi pélosi xanim teywen'ge yétip barghandin kéyin muhim bayanat élan qilip, amérikaning teywendiki démokratiye we erkinlikni qoghdaydighanliqini, mustebit küchlerning tehditi we zulumigha uchrawatqan xelqlerge yar-yölek bolidighanliqini bildürgen. U teywen prézidénti sey yingwén qatarliq dölet erbabliri bilen körüshkendin bashqa, yene teywendiki her sahe zatliri, kishilik hoquq qoghdighuchiliri we pa'aliyetchiler bilen körüshken؛ shu qatarda teywen parlaménti kishilik hoquq komitétining bash katipi, 1989-yildiki tyen'enméin oqughuchilar herikitining yétekchiliridin biri bolghan örkesh dölet bilen körüshüp, her qandaq yerde, her qandaq sorunda Uyghurlarning yénida turidighanliqini tekitligen.

Nensi pélosi xanim 8-ayning 3-küni yollighan tiwétida teywendiki démokratik zatlar bilen körüshkenliki heqqide uchur bérip mundaq dégen: “Bügün wekiller ömikimiz teywendiki sabiq siyasiy jinayetchiler bilen birlikte ‛nati kishilik hoquq muzéyi‚ ni ziyaret qildi. Andin biz ammiwi teshkilat rehberlirining kishilik hoquq doklatini angliduq we ularning jasaritidin ilham alduq”.

Nensi pélosi xénim teywenni ziyaret qilishtin bir nechche kün burun örkesh dölet özining tiwittér hésabida mundaq dep yazghan: “Shundaq jezmleshtürüshke boliduki, amérika hökümiti kommunist xitaygha nechche on yil mujimel siyaset yürgüzüp kelgenidi, nensi pélosining teywen ziyariti buninggha xatime béridu. Yene shundaq déyishke boliduki, amérikaning xitay siyasitining özgirishi bilen, dunyada yipyéngi weziyet barliqqa kélidu”.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.