Японийә дөләт мудапиә вәзири «нәнҗиң қирғинчилиқи» һәққидики соаллардин өзини қачурған

Мухбиримиз җүмә
2016-08-07
Share


Японийәниң йеңи тәйинләнгән дөләт мудапиә вәзири томоми инада ханим нәнҗиң қирғинчилиқи һәққидики соаллардин өзини қачурған болуп, бу хитай даирилириниң наразилиқини қозғиған.

Хитай мудапиә министирлиқи җүмә күни өз тор бетидә елан қилған баянатида инада ханимни «тарихни бурмилиди» дәп әйиблигән.

Томоми инада японийә баш вәзири шинзо абе чаршәнбә күни йеңи тәшкиллигән ички кабинетта дөләт мудапиә вәзири болуп вәзипә алған иди.

У, японийәдики қанун өзгәртиш тәшәббусчилириниң бири болуп, иккинчи дуня урушидин кейин түзүлгән японийә асасий қанунини түзитип, япон әскәрлириниң ролини өзгәртишни қоллап кәлгән.

Хитай һөкүмити япон әскәрлириниң 1937 - йили сабиқ хитай пайтәхти нәнҗиңдә 300 миң адәмни қирип ташлиғанлиқини илгири сүрүп, буниңға атап музейларни ясиған. Әмма мәлум болушичә, японийәдә бир қисим сиясийон вә зиялийлар бу санни, һәтта қирғинчилиқниң болғанлиқиниму етирап қилмайдикән.

Шуңлашқиму бу нуқта японийә - хитай мунасивәтлиридики назук темиларниң бири болуп кәлгәниди.

Ройтерсниң нәқил қилишичә, пәйшәнбә күндики бир ахбарат елан қилиш йиғинда «японийәниң уруш мәзгилдики һәрикитини таҗавузчилиқ дәп аташқа боламду?» дегән соалларға дуч кәлгән инада ханим «бу кимниң нуқтисида туруп қарашқа бағлиқ» дәп җаваб бәргән. У йәнә бу һәқтики соалларға өзиниң җаваб бериши мувапиқ әмәсликиниму билдүргән.

Хитай ташқи ишлар министирлиқи баянатида: «униң пакитларни очуқ - ашкара рәт қилиши японийәниң таҗавузчилиқ тарихини йошуруш вә милитаризмни тирилдүрүп хәлқара тәртипкә риқабәт елан қилиш» дәп наразилиқ билдүргән.

Японийә бу йил мартта өзиниң асасий қануниға өзгәртиш киргүзүп, японийә әскәрлириниң чәтәл тупрақлирида җәң қилалмаслиқ тарихиға хатимә бәргән иди.

Бу әйни чағда хитайниң күчлүк етираз билдүрүшигә учриған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.