Yaponiye dölet mudapi'e weziri "Nenjing qirghinchiliqi" heqqidiki so'allardin özini qachurghan

Muxbirimiz jüme
2016-08-07
Share


Yaponiyening yéngi teyinlen'gen dölet mudapi'e weziri tomomi inada xanim nenjing qirghinchiliqi heqqidiki so'allardin özini qachurghan bolup, bu xitay da'irilirining naraziliqini qozghighan.

Xitay mudapi'e ministirliqi jüme küni öz tor bétide élan qilghan bayanatida inada xanimni "Tarixni burmilidi" dep eyibligen.

Tomomi inada yaponiye bash weziri shinzo abé charshenbe küni yéngi teshkilligen ichki kabinétta dölet mudapi'e weziri bolup wezipe alghan idi.

U, yaponiyediki qanun özgertish teshebbuschilirining biri bolup, ikkinchi dunya urushidin kéyin tüzülgen yaponiye asasiy qanunini tüzitip, yapon eskerlirining rolini özgertishni qollap kelgen.

Xitay hökümiti yapon eskerlirining 1937 - yili sabiq xitay paytexti nenjingde 300 ming ademni qirip tashlighanliqini ilgiri sürüp, buninggha atap muzéylarni yasighan. Emma melum bolushiche, yaponiyede bir qisim siyasiyon we ziyaliylar bu sanni, hetta qirghinchiliqning bolghanliqinimu étirap qilmaydiken.

Shunglashqimu bu nuqta yaponiye - xitay munasiwetliridiki nazuk témilarning biri bolup kelgenidi.

Roytérsning neqil qilishiche, peyshenbe kündiki bir axbarat élan qilish yighinda "Yaponiyening urush mezgildiki herikitini tajawuzchiliq dep atashqa bolamdu?" dégen so'allargha duch kelgen inada xanim "Bu kimning nuqtisida turup qarashqa baghliq" dep jawab bergen. U yene bu heqtiki so'allargha özining jawab bérishi muwapiq emeslikinimu bildürgen.

Xitay tashqi ishlar ministirliqi bayanatida: "Uning pakitlarni ochuq - ashkara ret qilishi yaponiyening tajawuzchiliq tarixini yoshurush we militarizmni tirildürüp xelq'ara tertipke riqabet élan qilish" dep naraziliq bildürgen.

Yaponiye bu yil martta özining asasiy qanunigha özgertish kirgüzüp, yaponiye eskerlirining chet'el tupraqlirida jeng qilalmasliq tarixigha xatime bergen idi.

Bu eyni chaghda xitayning küchlük étiraz bildürüshige uchrighan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet