Shimaliy atlantik ehdi teshkilati rosiyeni bu “Bimene urush” ni toxtitishqa chaqirdi

Shimaliy atlantik ehdi teshkilatigha eza döletlerning rehberliri 25-féwral jiddiy sin yighini ötküzüp, rusiyeni “Bu bimene urushni toxtitishqa, herbiy hujumgha derhal xatime bérishke, barliq qisimlirini ukra'inadin chékindürüshke, söhbet yoligha qaytip kélishke we tajawuzchiliqtin waz kérchishke” chaqirghan.

Shimaliy atlantik ehdi teshkilatning bildürüshiche, yighinda barliq rehberler rusiyening ‍ukra'inani sewebsiz we yolsiz halda ishghal qilishigha qarita ortaq inkas qayturushqa qoshulghan. Bu yighin'gha yene sh a e t ning yéqin shérikliridin finlandiye, shwétsiye shundaqla yawropa ittipaqimu qatnashqan.

Sh a e t rehberlirining bayanatida “Rusiyening herkitige qarita sh a e t ning heywe qilish küchi we mudapiyi'esi üchün zörür bolghan tedbirlerni alimiz. Ittipaqdashlar ‛washin'gton shertnamisi‚ ning 4-maddisigha asasen muzakirilerde boldi. Pütün ittipaqdashlirimizning bixterliki we mudapiyesini qoghdash üchün pütün zörür tedbirlerni we qararlarni élishni dawamlashturimiz,” déyilgen. Buning aldida amérika prézidénti baydén, rusiye iqtisadining halqiliq pul-mu'amile apparatlirigha, shirket we shexslerge qarita etrapliq we ejellik imbargo yürgüzidighanliqi, sh a e t qisimlirigha bolghan herbiy yardemni kücheytidighanliqini jakarlighan idi.

Xelqara taratqularning éytishiche, nöwette xitayning rusiyege tutqan mu'amilisi “Xitay rusiyeni yeng ichide qollawatamdu‚ dégen gumanni téximu kücheytmekte iken. Xitay tashqiy ishlar ministirliqi rusiyening ukra'inagha herbiy hujum qozghishini “Tajawuzchiliq” dep étirap qilishni ret qilip, uninggha imbargo yürgüzüshke qarshi chiqqan idi. “Nyu-york waqtigéziti” ning ashkarilishiche, amérika yéqinqi 3 ay mabeynide xitay terep bilen 6 qétim uchriship, xitay tashqiy ishlar ministiri wang yi we xitayning washin'gtondiki bash elchisi chin ganggha rusiyening ukra'inagha qoshun kirgüzidighanliqi, xitayning rusiye bilen sözliship, buning aldini élishini telep qilghan bolsimu, biraq xitay terep buninggha perwa qilmighan.