Хитайниң хириси тунҗи қетим шималий атлантик әһди тәшкилатиниң йеңи истиратегийә тәссәввуриға киргүзүлгән

Мухбиримиз әркин
2022.04.08
Share on WhatsApp
Share on WhatsApp

Шималий атлантик әһди тәшкилати (NATO) хитайниң бихәтәрлик вә демократийәгә селиватқан системилиқ хириси түпәйли униң йәр шаривий тәсири вә мәҗибурлаш сияситини тунҗи қетим өзиниң йеңи истиратегийә тәссәвуриға киргүзгән.

Мәлум болушичә, хитайниң тәсири шималий атлантик окян әһди тәшкилати ташқий ишлар министирлириниң 6-вә 7-апрел күнлири берюсселда өткүзүлгән йиғинида музакирә қилинған. Ш а ә т ниң баш катипи столтенберг 7-апрел өткүзгән ахбарат йиғинида, ташқий ишлар министирлириниң украинаға ярдәмни техиму күчәйтиш вә давамлаштуруш билән бир вақитта, асия-тинч окян районидики һәмкарлиқни күчәйтишкә қошулғанлиқини ейтқан. Ш а ә т ниң бу нөвәтлик йиғиниға украина, грозийә, шиветсийә, финландийәдин башқа униң асия-тинч окян районидики шериклиридин австиралийә, японийә, йеңи зеландийә, җәнубий корийә қатарлиқ дөләтләрму қатнашқан.

Мәлум болушичә, хитайниң русийәгә болған малийә вә һәрбий ярдими ш а ә т да украина урушиниң техиму узунға созулуп кетиш әндишисини күчәйткән болуп, у асийә-тинч окян районидики дөләтләр билән болған һәмкарлиқини күчәйтиш арқилиқ, хитайниң русийәгә ярдәм қилишини тосушни үмид қилмақта икән. Столтенберг ахбарат йиғинида мундақ дигән: “биз хитайниң русийәниң таҗавузчилиқини тәнқид қилишни халимайдиғанлиқини көрдуқ. Бейҗиң билән москва изчил башқа дөләтләрниң өз йолини таллаш һоқуқи барлиқидин гуман қилип кәлди. Бу бизниң һәммимиз үчүн интайин җиддий хирис. Бу бизниң техиму иттипақлишип, қиммәт қаришимизни қоғдишимизниң зөрүрийитини йәниму һес қилдурди.”

Мәлум болушичә, ш а ә т ташқий ишлар министирлири йәнә бу йил 6-айдики мадрид башлиқлар йиғинидин бурун ш а ә т ниң кейинки басқучлиқ истратегийә тәсәввурини музакирә қилған. Столтенберг, ш а ә т ниң йеңи истратегийә тәсәввури йеңи бихәтәрлик реаллиқиға маслишип, хитайниң тәсир күчи вә мәҗибурлаш характерлик сияситини ойлишишқа еһтияҗ туйғанлиқини билдүргән. У шималий атлантик әһди тәшкилати “тунҗи қетим хитайниң күнсери күчийиватқан тәсир күчи вә мәҗбурлаш характерлик сияситиниң бихәтәрликимизгә қандақ тәсир көрситидиғанлиқини чоқум ойлишиши зөрүр болди,” дегән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт