Хитай ташқий ишлар миистирлиқи NED ни “уйғурларға пул берип хитайға қарши ағдурмичилиқ қилди” дәп һуҗум қилған

Мухбиримиз әркин
2022-05-09
Share

Хитай ташқий ‍ишлар министирлиқи 8-май күни доклат елан қилип, “америка демократийәни алға сүрүш фонди” (NED) ни уйғур тәшкилатлириға пул берип, “шинҗаң мустәқиллиқи” ға қутратқулуқ қилиш, хитайниң сиясий, иҗтимаий муқимлиқиға бузғунчилиқ қилиш билән әйибләп, һуҗум қилған. Бу хитай һөкүмитиниң 1983-йили қурулған, уйғурларниң кишилик һоқуқ, демократик һәқлирини қоллап келиватқан бу тәшкилатқа тунҗи қетим һуҗум қилиши болмисиму, әмма тунҗи қетим мәхсус доклат елан қилип һуҗум қилишидур.

Хитай ташқий ишлар министирлиқи “демократийәни алға сүрүш фонди: пакитлар җәдвели” намлиқ доклатида, бу тәшкилатни дунядики бөлгүнчилик исянлири, “рәңлик инқилап” вә сиясий керизисларниң баш пиланлиғучиси, шундақла сербийә, грозийә, ‍украина һәм оттура-шәрқ әллиридики “әрәп баһари” ниң арқисидики қутратқучи, дәп әйиблигән.

Мәзкур доклатта NED ниң һәр йили хитайға қарши программиларға зор миқтарда мәбләғ селип, “шинҗаң мустәқиллиқи”, “хоңкоң мустәқиллиқи” вә “тибәт мустәқиллиқи” ға қутратқулуқ қилип кәлгәнлики, униң дуня уйғур қурултийи билән кишилик һоқуқни көзитиш тәшкилатини пул билән тәминлигәнлики, уларниң “шиҗаңдики ирқий қирғинчилиқ”, “бир милйон адәм тәрбийәләш мәркәзлиригә қамалған” дегәндәк өсәк сөзләрни тарқитип кәлгәнликини илгири сүргән.

Хитай ташқий ишлар министирлиқиниң бу доклати, хитайниң уйғурларға ирқий қирғинчилиқ қилғанлиқиға йетәрлик дәлилләр бар, дәп қаралсиму, әмма униң бу дәлилләрни рәт қилип, б д т кишилик һоқуқ алий комиссариниң уйғур елида чәклимисиз тәкшүрүш елип беришини қобул қилмиған, униң 5-ай ичидә елип баридиған зияритини пәқәтла “достанә зиярәт” даирисдә чәклигән бир вақитта елан қилинған. Хитайниң “йәр шари вақти гезити” му 8-май елан қилған бу һәқтики хәвиридә, NED ни 2004-йилдин 2020-йилғичә дуня уйғур қурултийини 8 милйон 760 миң доллар ярдәм пули билән тәминлигән, дәп әйиблигән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт