Хитай уйғур елидики бир қисим нефит участикилириға херидар чақирған

Рейтерсниң 20 - өктәбир хәвәр қилишичә, хитай земин байлиқи министирлики уйғур елидики бир қисим нефит вә тәбиий газ участикилириға мәбләғ салғучи херидар чақирған.

Мәлум болушичә, уйғур елидики нефит вә тәбиий газ бурғилашни пүтүнләй дегүдәк контрол қилидиған хитай һөкүмити үчүн уйғур елидики нефит участикилириға херидар чақириш бәк кәм учрайдиған әһвал икән.

Рейтерсниң бу иштин хәвәрдә бир һөкүмәт хадимидин нәқил елип хәвәр қилишичә, хитай даирилири сәйшәнбә күнидин башлап телевизийә еланлири арқилиқ уйғур елидики җәмий 3 нефит вә тәбиий газ участикисини базарға салған.

Нәтиҗидә бейҗиңдики йәрлик һөкүмәт қоллайдиған бейҗиң енергийә мәбләғ селиш һәссидарлиқ ширкити хитай һөкүмәт игидарчилиқидики җуңго нефитигә охшаш 13 күчлүк риқабәтчисини йеңип, бу нефитликләрни ечиш һоқуқиға еришкән.

Хәвәрдә бу қетим херидар чақирилған нефитликниң қәйәргә җайлашқанлиқи ениқ көрситилмигән.

Хәвәргә қариғанда, бейҗиң ширкити юқирида тилға елинған нефит участикисиға 16 милярд хитай пули чиқарған.

Хитай һөкүмити елан қилған санлиқ мәлуматларға қариғанда, 2014 - йилиғичә уйғур елидә байқалған нефит записи 5.6 Милярд тонна болуп, хитай уйғур елидә күнигә җәмий 540 миң туң нефит ишләп чиқиридикән.

Хитай 2010 - йилдики аталмиш “шинҗаң хизмәт йиғини” дин кейин уйғур елидики тәбиий байлиқларни ечиш қәдимини җиддий тезләткән иди.