Камбрич университети хитайниң нәшрият әркинлики чәклимисигә боюн әгмәйдиғанлиқини ипадилиди

Мухбиримиз шөһрәт һошур
2017-08-21
Share

Камбрич университети тәрипидин хитайда нәшр қилиниватқан хитай пәсиллики журнили бүгүн тәһрир илависи елан қилип, журналниң тор амбиридин илгири чиқириветилгән 300 нәччә парчә мақалини әслигә кәлтүридиғанлиқини вә хитай һәққидики тәрәпсиз вә мәсулийәтчан тәтқиқатчилиқида чиң туридиғанлиқини билдүрди.

Журнал тәһририниң намида елан қилинған тәһрир илависидин мәлум болушичә, бирқанчә күндин буян дуня миқясидики нопузлуқ тәтқиқатчилар арқа-арқидин очуқ хәт елан қилип вә имза топлап мәзкур университетниң хитайниң нәшрият чәклимилирини қобул қилғанлиқини тәнқид қилғандин кейин, камбрич университетиниң нәшрият бөлүми мәхсус бу һәқтә йиғин ечип, мәвҗут инкаслар һәққидә музакирә елип барған.

Музакирә нәтиҗисидә, хитай пәсиллики журнилиниң торидин чиқириветилгән 315 парчә мақалини дәрһал әслигә кәлтүрүш қарари елинған.

Түнүгүн хитай күндилик гезити қатарлиқ ахбарат органлири әгәр ғәрб тәтқиқат органлири хитайниң қанун-түзүмлирини яқтурмиса, хитайдин айрилиш әркинлики барлиқини әскәрткән. Камбрич университетиға йезилған очуқ хәтләрдә, хитайниң һәқсиз тәрәплиригә боюн әгмәсликкә вә хитайниң диктатор қаидә түзүмлирини хәлқарағиму теңишиға йол қоймаслиққа дәвәт қилинған иди.

Камбрич университети әнглийәдики дуня бойичә иккинчи чоң қәдимий вә илмий нопузлуқ университеттур.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.