Хитайниң лагерларға даир 403 бәтлик мәхпий һөҗҗити америка дөләт мәҗлиси әзалириниң күчлүк инкасини қозғиди

Мухбиримиз әркин
2019-11-18
Елхәт
Пикир
Share
Принт
Хитайниң уйғур районидики лагерларға даир 400 бәтлик мәхпий һөҗҗитини ашкарилаш үчүн «ню-йорк вақти гезити» гә бесилған хәвәрдин сүрәткә елинған. 2019-Йили 16-ноябир.
Хитайниң уйғур районидики лагерларға даир 400 бәтлик мәхпий һөҗҗитини ашкарилаш үчүн «ню-йорк вақти гезити» гә бесилған хәвәрдин сүрәткә елинған. 2019-Йили 16-ноябир.
nytimes.com

«Ню-йорк вақти гезити» ниң 16‏-ноябир күни хитайниң уйғур аптоном районидики йиғивелиш лагерлириға даир 403 бәтлик мәхпий һөҗҗитини ашкарилиши америка дөләт мәҗлиси әзалирида күчлүк инкас қозғиған.

Америка кеңәш палата әзаси, демократлар партийәсиниң президент намзатлириниң бири болған елзабет варен 16‏-ноябир күни тветтирда «ню-йорк вақти гезити» ниң хәвиригә инкас билдүрүп, хитайниң уйғурларға тутқан муамилисини «қорқунчлуқ кәмситиш вә кишилик һоқуқ дәпсәндичилики» дәп әйиблигән.

Елзабет варен, «хитай һөкүмитиниң мусулманларға вә аз санлиқ милләтләргә тутқан шәпқәтсиз вә кәмситиш характерлик муамилиси қорқунчлуқ кишилик һоқуқ дәпсәндичиликидур. Биз дөләт ичидә вә пүтүн дуняда нәпрәткә һәм радикаллиққа қарши дәс турушимиз керәк» дегән.

Шу күни йәнә америка кеңәш палата әзаси марко рубио тветтирға йоллиған инкасида, мәхпий һөҗҗәтниң хитайниң уйғурларни шәпқәтсиз вә рәһимсизлик билән бастуруватқанлиқини ашкарилап бәргәнликини тәкитлигән. Униң инкасида: «ашкариланған һөҗҗәтләр хитай һөкүмитиниң шинҗаңдики аз санлиқ милләтләрни райондики мусулманларни омумйүзлүк қамаш арқилиқ қандақ шәпқәтсизләрчә, рәһимсизләрчә вә системилиқ бастуруш һәққидә буйруқ чүшүргәнликини ашкарилап бәрди. Улар даириләргә қәтий рәһим қилмаслиқни буйруған» дейилгән.

Кеңәш палата әзаси җәрий моранниң тветтирдики инкасида америка авам палатасиниң «уйғур кишилик һоқуқ қанун лайиһәси» ни тезрәк мақуллиши тәләп қилинған. У, «хитайниң уйғур мусулманлирини бастуруши ашкара дәпсәндичиликтур. Авам палатаси кеңәш палатасида мақулланған ‹уйғур кишилик һоқуқ қанун лайиһәси'мәсилисидә тез һәрикәт қилиши керәк» дәп тәкитлигән.

Америка дөләт мәҗлисиниң хитай ишлири комитети, 18‏-ноябир күни тветтирда елан қилған баянатида, буниңда җавабкарлиқи бар хитай әмәлдарлирини җазалашни тәләп қилған. Баянатта: «шинҗаң һәққидики һөҗҗәтләрдә узундин бери мәлум болған нәрсиләр испатланди. Америка вә хәлқара, бу рәһимсиз һәрикәтни елип барған сиясий бюро әзаси чен чүәнго қатарлиқ юқири дәриҗилик хитай әмәлдарлириға ембарго қоюши, дөләт мәҗлиси қанун мақуллап, бу қорқунчлуқ хорлашқа қарши туруши керәк» дейилгән.

«Ню-йорк вақит гезити» 16‏-ноябир күни хитайниң 403‏-бәтлик лагерлар һәққидики мәхпий һөҗҗитини елан қилип, дуняда қаттиқ ғулғула қозғиғаниди.

Пикирләр (0)
Share
Толуқ бәт