Xitayning lagérlargha da'ir 403 betlik mexpiy höjjiti amérika dölet mejlisi ezalirining küchlük inkasini qozghidi

Muxbirimiz erkin
2019-11-18
Élxet
Pikir
Share
Print
Xitayning Uyghur rayonidiki lagérlargha da'ir 400 betlik mexpiy höjjitini ashkarilash üchün "Nyu-york waqti géziti" ge bésilghan xewerdin süretke élin'ghan. 2019-Yili 16-noyabir.
Xitayning Uyghur rayonidiki lagérlargha da'ir 400 betlik mexpiy höjjitini ashkarilash üchün "Nyu-york waqti géziti" ge bésilghan xewerdin süretke élin'ghan. 2019-Yili 16-noyabir.
nytimes.com

"Nyu-york waqti géziti" ning 16‏-noyabir küni xitayning Uyghur aptonom rayonidiki yighiwélish lagérlirigha da'ir 403 betlik mexpiy höjjitini ashkarilishi amérika dölet mejlisi ezalirida küchlük inkas qozghighan.

Amérika kéngesh palata ezasi, démokratlar partiyesining prézidént namzatlirining biri bolghan élzabét warén 16‏-noyabir küni twéttirda "Nyu-york waqti géziti" ning xewirige inkas bildürüp, xitayning Uyghurlargha tutqan mu'amilisini "Qorqunchluq kemsitish we kishilik hoquq depsendichiliki" dep eyibligen.

Élzabét warén, "Xitay hökümitining musulmanlargha we az sanliq milletlerge tutqan shepqetsiz we kemsitish xaraktérlik mu'amilisi qorqunchluq kishilik hoquq depsendichilikidur. Biz dölet ichide we pütün dunyada nepretke hem radikalliqqa qarshi des turushimiz kérek" dégen.

Shu küni yene amérika kéngesh palata ezasi marko rubi'o twéttirgha yollighan inkasida, mexpiy höjjetning xitayning Uyghurlarni shepqetsiz we rehimsizlik bilen basturuwatqanliqini ashkarilap bergenlikini tekitligen. Uning inkasida: "Ashkarilan'ghan höjjetler xitay hökümitining shinjangdiki az sanliq milletlerni rayondiki musulmanlarni omumyüzlük qamash arqiliq qandaq shepqetsizlerche, rehimsizlerche we sistémiliq basturush heqqide buyruq chüshürgenlikini ashkarilap berdi. Ular da'irilerge qet'iy rehim qilmasliqni buyrughan" déyilgen.

Kéngesh palata ezasi jeriy moranning twéttirdiki inkasida amérika awam palatasining "Uyghur kishilik hoquq qanun layihesi" ni tézrek maqullishi telep qilin'ghan. U, "Xitayning Uyghur musulmanlirini basturushi ashkara depsendichiliktur. Awam palatasi kéngesh palatasida maqullan'ghan 'Uyghur kishilik hoquq qanun layihesi'mesiliside téz heriket qilishi kérek" dep tekitligen.

Amérika dölet mejlisining xitay ishliri komitéti, 18‏-noyabir küni twéttirda élan qilghan bayanatida, buningda jawabkarliqi bar xitay emeldarlirini jazalashni telep qilghan. Bayanatta: "Shinjang heqqidiki höjjetlerde uzundin béri melum bolghan nersiler ispatlandi. Amérika we xelq'ara, bu rehimsiz heriketni élip barghan siyasiy byuro ezasi chén chüen'go qatarliq yuqiri derijilik xitay emeldarlirigha émbargo qoyushi, dölet mejlisi qanun maqullap, bu qorqunchluq xorlashqa qarshi turushi kérek" déyilgen.

"Nyu-york waqit géziti" 16‏-noyabir küni xitayning 403‏-betlik lagérlar heqqidiki mexpiy höjjitini élan qilip, dunyada qattiq ghulghula qozghighanidi.

Toluq bet