Nike Вә H&M уйғур мәҗбурий әмгикигә қарши турғанлиқи үчүн хитайларниң наразилиқиға учриған

Мухбиримиз ирадә
2021-03-25
Share

Дуня бойичә тонулидиған кийим-кечәк маркилири Nike вә H&M уйғурларниң пахта мәһсулатлирини пишшиқлап ишләш саһәсидә мәҗбурий әмгәккә селиниватқанлиқи һәққидики хәвәрләрдин әндишиләнгәнликини вә мәҗбурий әмгәк асасдики пахта мәһсулатлирини ишләтмәйдиғанлиқини елан қилип, чәтәлләрдә зор алқишқа еришкәниди. Бирақ йеқинқи икки күндин буян туюқсизла хитайда бу маркиларни тәнқидләш, бойқут қилиш һәрикәтлири қозғулуп кәткән.

Хитайниң вейбо торида нурғун хитайлар бу маркиларни тиллап һақарәтлигән, бәзи хитай чолпанлири бу маркилар болған алақисини үзгәнликини җакарлиған, һәтта алибаба қатарлиқ хитай тор сода супилиридин H&M маркисиниң маллири чиқириветилгән.

Әслидә H&M ширкити уйғурларниң мәҗбурий әмгәккә селиниватқанлиқиған болған әндишиси һәққидики баянатини өткән йили сентәбирдә елан қилған вә хитайдики пахта мәһсулатлири тәминләш зәнҗирлири билән алақисини үзгәнликини җакарлиғаниди. Ройтерсниң ейтишичә, Nike шркитиниң бу баянатни қачан елан қилғанлиқи ениқ болмисиму әмма уму йеңи әмәс икән.

Бу маркиларниң кона баянатлириниң қандақ болуп һала бүгүнки күнгә кәлгәндә хитайдики тор бәтләрдә пәйда болуп қалғанлиқи ениқ әмәс әмма униң дәл бу һәптә яврупа иттипақи, америка, әнглийә вә канада қатарлиқлар бирликтә хитай әмәлдарлири вә органлириға җаза тәдбирини елан қилғандин кейин пәйда болуши диққәт қозғайдикән.

Германийәлик тәтқиқатчи адриян зенз бу һәқтә тивиттирда язған учурида бу һәқтә тохтулуп "бу бейҗиңниң шинҗаңға аит мәсилиләрдики асаслиқ истратегийәлик өзгиришини көрситип беридиған иккинчи мисал. Йәни хитай һазир шинҗаңдики мәсилиләрни актиплиқ билән инкар қилиштин актиплиқ билән қайтурма һуҗумға өтүшкә өзгәртти. Һазир у ғәрб ширкәтлирини мәҗбурий әмгәккә шерик болушқа мәҗбурлаватиду" дәп язған.

Хитай һөкүмити давамлиқ түрдә хитай хәлқини дунядики даңлиқ маркиларни бойқут қилишқа күшкүртүш, уни дөләтниң иззәт-абройи мәсилиси қиливелиштәк вастиләр арқилиқ уни хәлқарада өзигә яқмайдиған сөз-һәрикәтләрни чәкләшниң усули қиливалғаниди. Бу қетимлиқ һәрикәттә хитайниң бу мәқсити йәниму ениқ ашкариланған.

Адриян зензк сөзидә америка вә яврупа қатарлиқ дөләтләр һөкүмәтлириниң мәхсус қанун арқилиқ чоқум хитайниң бу тактикисиға зәрбә бериши керәкликини билдүргән.

Хитайдики тәшвиқат апаратлири һазир бәс-бәстә тәшвиқат видийолирини ишләп тарқитип, уйғурларниң пахта мәһсулатлири саһәсидә мәҗбурий әмгәккә селиниватқанлиқини инкар қилишқа урунмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт