Ниңшада туңганларниң диний тәлимдә әрәблишиши чәкләнди

Мухбиримиз меһрибан
2017-01-03
Елхәт
Пикир
Share
Принт

Бултур йил ахири хитайда йүз бәргән «мусулманлартори» ниң тақилиши вә «һалал» йемәклик талаш-тартишидин кейин, даириләрниң йемәкликләрдә «һалал» сөзиниң орниға «мусулманчә йемәклик» маркисини қоллинишни тәләп қилиши вә ниңша аптоном райониниң партком секретари ли җйәнхуаниң ислам дининиң әрәблишиши чәклинидиғанлиқи һәққидә дегән сөзлири җиддий инкас қозғиди.

Хитай хәвәрлиридин мәлум болушичә, ниңша туңган аптоном райониниң партком секретари ли җйәнхуа йеңи йил һарписида диний саһәдикиләргә сөз қилип,«мәркизий һөкүмәтниң йолйоруқиға асасән ниңша,шинҗаң қатарлиқ җайларда ислам дининиң әрәблишишиниң алдини елиш керәк. Чәтәлләрдики ислами тәшкилатларға қатнишиш, диний мәсилә әмәс, бәлки җиддий сиясий мәсилә» дегән вә «җуңгочә ислам динида чиң туруш» ни тәкитлигән.

Иҗтимаий таратқулардики муназириләрдә, даириләрниң йеқиндин буян туңганлар районидиму диний чәклимиләрни көпәйтип, әрәбчә «һалал» сөзигә диний радикаллиқ ипадиси дегәндәк қалпақларни кийдүрүп «һалал» маркисини чәкләш, туңганлар арисида барғанчә күчийиватқан әрәбчә өгиниш қизғинлиқини чәкләш, йеңидин мәсчит селишқа рухсәт қилмаслиқ қатарлиқ васитиләрни қоллинип туңганларниң диний етиқадини бастурушни күчәйткәнлики сөз темиси болди. Дуня уйғур қурултийи баянатчиси дилшат ришит бу йүзлинишниң яман ақивити һәққидә тохтилип, «даириләрниң туңганлар районидиму диний етиқад чәклимисини күчәйтиши, туңган мусулманлириниң наразилиқ кәйпиятини күчәйтип уйғур дияридики қаршилиқ һәрикәтлиригә охшаш радикал қаршилиқниң туңганлар районидиму йүз беришигә сәвәб болидиғанлиқи» ни агаһландурди.

Пикирләр (0)
Share
Толуқ бәт