Nobél tinchliq mukapati sahibliri obamani lyu shawbo mesiliside shi jinpinggha bésim ishlitishke chaqirdi

12 Neper nobél tinchliq mukapati sahibi amérika prézidénti barak obamagha mektup yollap, uni shi jinpinggha türmidiki yazghuchi lyu shawboni qoyuwétish heqqide bésim qilishqa chaqirdi.

Jenubiy afriqiliq tinchliq mukapati sahibi tütüni öz ichige alghan bu yazghuchilar mektupida hazirghiche lyu shawboni qoyuwétish üchün qilin'ghan “Yeng ichi diplomatiyisi” ning kargha kelmigenlikini eskertip “Eger silerge oxshash rehberler jiddiy tedbir élip, mesilini ochuq-ashkara we yoshurun shekillerde kötürüp chiqmisa, xitay xataliqlirini bundin kéyinmu dawam qilidu” dédi.

Roytérs agéntliqining xewer qilishiche, “Derhal erkinlik” teshkilatining bashliqi jeyrid génsérmu birlikte élan qilghan mektupida aqsaraydin hazirghiche héchkimning lyu shawbo we uning ayali lyu shaning mesilisini ochuq tilgha élip baqmighanliqini tenqid qilghan.

Amérika prézidénti barak obama peyshenbe we jüme ikki kün xitay dölet re'isi shi jinping bilen uchrishishlarda bolidu. Bu qétimqi ziyaret aldida kishilik hoquq organliridin obamagha küchlük chaqiriqlar keldi. Shunga aqsaray tünügün élan qilghan bayanatida kishilik hoquqning ikki terep uchrishishliridiki eng muhim témilarning biri bolidighanliqini bildürdi.