Тумшуқ шәһиридики «нопус көчүрүш» һәрикитидә уйғур деһқанлар көчүрүлмәктә

Мухбиримиз әзиз
2018-04-17
Елхәт
Пикир
Share
Принт

Йеқинда тарим бостанлиқидики йеңидин бәрпа болған тумшуқ шәһиригә қарашлиқ 3-девизийә тәвәсидики уйғур деһқанларниң «намратлиқтин қутулдуруш» шоари астида қошна биңтуәнләрдики хитайлар арисиға көчүрүлүватқанлиқи мәлум болди.

«Тәңритағ тори» ниң 12-апрелдики хәвиридә ейтилишичә, 3-девизийә тәвәсидики уйғур деһқанларниң бирнәччә модинла йәрлири болуп, йери аз уйғур деһқанлири «көп миқдарда терилғу йәр берилиду» дегән нам астида қошна «биңтуән» ротилиридики йәрләрни теришқа йөткәлгән. Мәзкур хәвәрдә ейтилишичә, 3-девизийә тәвәсидики барлиқ намрат аилиләрниң 99.7 Пирсәнтини уйғурлар тәшкил қилидикән.

Хәвәрдин мәлум болушичә, 2017-йили декабирдин башлап һазирғичә 4400 аилиликтин артуқрақ намрат уйғур деһқанлар башқа җайларға көчүрүш хизмити җиддий ишлиниветипту. Көчүп барған уйғур деһқанларниң пәрзәнтлири болса һәқсиз «қош тиллиқ йәсли» ләргә қобул қилинипту.

Тумшуқ шәһиридики алақидар һөкүмәт тармақлири бу һәқтә тохтилип «бу намрат деһқанларни өзлири көчүп барған җайлардикиләр билән өзара арилаштуруп, уларға дөләт тили вә йезиқини өгитиш арқилиқ бай болушқа йетәкләймиз» дегән.

Шундақла бу хил нопус көчүрүш тәдбириниң арилаш олтурақлишиш муһити бәрпа қилиш, уйғурлар билән хитайларниң өгиниш вә турмушта биллә болуп муқимлиқни бирликтә қоғдишиға шараит яритип бериш роли барлиқи тәкитләнгән.
Уйғур паалийәтчиләр бу һәқтә пикир қилип «бу хитай һөкүмитиниң ‹уйғурларни бай қилиш' намида уйғур деһқанлирини миллий ассимилятсийәниң қурбанлири қиливатқанлиқиниң ипадиси» деди.

Алақидар материялларда көрситилишичә, тумшуқ шәһириниң һазирқи нопуси160 миң әтрапида болуп, уйғурлар омумий нопусниң 70 пирсәнтини тәшкил қилидикән.

Пикирләр (0)
Share
Толуқ бәт