Tumshuq shehiridiki "Nopus köchürüsh" herikitide Uyghur déhqanlar köchürülmekte

Muxbirimiz eziz
2018-04-17
Élxet
Pikir
Share
Print

Yéqinda tarim bostanliqidiki yéngidin berpa bolghan tumshuq shehirige qarashliq 3-déwiziye tewesidiki Uyghur déhqanlarning "Namratliqtin qutuldurush" sho'ari astida qoshna bingtu'enlerdiki xitaylar arisigha köchürülüwatqanliqi melum boldi.

"Tengritagh tori" ning 12-apréldiki xewiride éytilishiche, 3-déwiziye tewesidiki Uyghur déhqanlarning birnechche modinla yerliri bolup, yéri az Uyghur déhqanliri "Köp miqdarda térilghu yer bérilidu" dégen nam astida qoshna "Bingtu'en" rotiliridiki yerlerni térishqa yötkelgen. Mezkur xewerde éytilishiche, 3-déwiziye tewesidiki barliq namrat a'ililerning 99.7 Pirsentini Uyghurlar teshkil qilidiken.

Xewerdin melum bolushiche, 2017-yili dékabirdin bashlap hazirghiche 4400 a'ililiktin artuqraq namrat Uyghur déhqanlar bashqa jaylargha köchürüsh xizmiti jiddiy ishliniwétiptu. Köchüp barghan Uyghur déhqanlarning perzentliri bolsa heqsiz "Qosh tilliq yesli" lerge qobul qiliniptu.

Tumshuq shehiridiki alaqidar hökümet tarmaqliri bu heqte toxtilip "Bu namrat déhqanlarni özliri köchüp barghan jaylardikiler bilen öz'ara arilashturup, ulargha dölet tili we yéziqini ögitish arqiliq bay bolushqa yétekleymiz" dégen.

Shundaqla bu xil nopus köchürüsh tedbirining arilash olturaqlishish muhiti berpa qilish, Uyghurlar bilen xitaylarning öginish we turmushta bille bolup muqimliqni birlikte qoghdishigha shara'it yaritip bérish roli barliqi tekitlen'gen.
Uyghur pa'aliyetchiler bu heqte pikir qilip "Bu xitay hökümitining 'Uyghurlarni bay qilish' namida Uyghur déhqanlirini milliy assimilyatsiyening qurbanliri qiliwatqanliqining ipadisi" dédi.

Alaqidar matériyallarda körsitilishiche, tumshuq shehirining hazirqi nopusi160 ming etrapida bolup, Uyghurlar omumiy nopusning 70 pirsentini teshkil qilidiken.

Toluq bet