Уйғурлар дияридики “ғәлитә” нопус йөткәш паалийәтлири диққәт қозғимақта

Мухбиримиз әзиз
2018.04.30

Уйғур дияридики әң назук темиларниң бири болған нопус мәсилисидә йеқиндин буян оттуриға чиқиватқан бәзи “ғәлитә” һадисиләр көзәткүчиләрниң диққитини қозғашқа башлиди.

Хитай һөкүмити башқурушидики шинхуа агентлиқиниң 28-апрелдики хәвиридә ейтилишичә, аталмиш “шинҗаң ишләпчиқириш вә қурулуш биңтуәни” өзлириниң кәспий қурулмисидики мәмурий хадим қислиқи мәсилисини һәл қилиш үчүн җәмийәттин төт миңдин артуқ мәмурий хадим қобул қилидиғанлиқини елан қилған.

Хәвәрдә көрситилишичә, бу хадимларниң йеримиға йеқини һәр хил мәктәпләргә оқутқучилиққа қобул қилинидикән. Йәнә келип бу хадимлар ақсу, қәшқәр, байинғолин вә хотән қатарлиқ җайлардики биңтуәнләрдин қобул қилинидикән. Һалбуки, уйғур дияри билән тонушлуқ болған мутәхәссисләр биңтуәнниң мәзкур девизийә лиридики нопус қурулмисида хитайларниң асасий орунни игиләйдиғанлиқини қәйт қилип кәлмәктә.

Шуниң билән биргә “ақсу ахбарат тори” ниң 27-апрелдики хәвиридә көрситилишичә, тоқсу наһийәси қатарлиқ җайларда һөкүмәт тармақлири “ешинча әмгәк күчини сиртқа йөткәш” намида йери йоқ, иқтисадий киримиму йоқ уйғур деһқанлирини ичкири өлкиләрдики “техника тәрбийәләш мәктипи” дә мәлум мәзгил оқутуп, хитай өлкилиридики завутларға ишләмчиликкә йоллап бәргән. Хәвәрдә көрситилишичә, бу йил 1-пәсилдә тоқсу наһийәсиниң өзидинла 5500 дин артуқ кишини сиртқа йөткәп “ишқа орунлаштурған”. Нөвәттә бу санниң йил ахирида 17 миңға йәткүзүлүши мөлчәрләнмәктә икән.

Уйғур паалийәтчиләр бу һәқтә пикир қилип, “уйғур дияридики миңлиған уйғур яшлири ишсиз йүрүватқан әһвалда бу кишиләрни ‛ешинчә әмгәк күчи‚ намида хитай өлкилиригә йөткәш шуниңдәк хитайларни асас қилған биңтуәнләргә техиму көп хитай яшлирини тәклип қилип келиш иши дәл уйғур дияридики мустәмликичилик сияситиниң ашкара ипадисидур, ” деди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.