Uyghurlar diyaridiki "Ghelite" nopus yötkesh pa'aliyetliri diqqet qozghimaqta

Muxbirimiz eziz
2018-04-30
Élxet
Pikir
Share
Print

Uyghur diyaridiki eng nazuk témilarning biri bolghan nopus mesiliside yéqindin buyan otturigha chiqiwatqan bezi "Ghelite" hadisiler közetküchilerning diqqitini qozghashqa bashlidi.

Xitay hökümiti bashqurushidiki shinxu'a agéntliqining 28-apréldiki xewiride éytilishiche, atalmish "Shinjang ishlepchiqirish we qurulush bingtu'eni" özlirining kespiy qurulmisidiki memuriy xadim qisliqi mesilisini hel qilish üchün jem'iyettin töt mingdin artuq memuriy xadim qobul qilidighanliqini élan qilghan.

Xewerde körsitilishiche, bu xadimlarning yérimigha yéqini her xil mekteplerge oqutquchiliqqa qobul qilinidiken. Yene kélip bu xadimlar aqsu, qeshqer, bayin'gholin we xoten qatarliq jaylardiki bingtu'enlerdin qobul qilinidiken. Halbuki, Uyghur diyari bilen tonushluq bolghan mutexessisler bingtu'enning mezkur déwiziye liridiki nopus qurulmisida xitaylarning asasiy orunni igileydighanliqini qeyt qilip kelmekte.

Shuning bilen birge "Aqsu axbarat tori" ning 27-apréldiki xewiride körsitilishiche, toqsu nahiyesi qatarliq jaylarda hökümet tarmaqliri "Éshincha emgek küchini sirtqa yötkesh" namida yéri yoq, iqtisadiy kirimimu yoq Uyghur déhqanlirini ichkiri ölkilerdiki "Téxnika terbiyelesh mektipi" de melum mezgil oqutup, xitay ölkiliridiki zawutlargha ishlemchilikke yollap bergen. Xewerde körsitilishiche, bu yil 1-pesilde toqsu nahiyesining özidinla 5500 din artuq kishini sirtqa yötkep "Ishqa orunlashturghan". Nöwette bu sanning yil axirida 17 minggha yetküzülüshi mölcherlenmekte iken.

Uyghur pa'aliyetchiler bu heqte pikir qilip, "Uyghur diyaridiki minglighan Uyghur yashliri ishsiz yürüwatqan ehwalda bu kishilerni 'éshinche emgek küchi' namida xitay ölkilirige yötkesh shuningdek xitaylarni asas qilghan bingtu'enlerge téximu köp xitay yashlirini teklip qilip kélish ishi del Uyghur diyaridiki mustemlikichilik siyasitining ashkara ipadisidur, " dédi.

Toluq bet