Нур бәкри уйғур елиниң байлиқлирини ечиш салмиқи ашурулиду, деди

Хитай дөләтлик енергийә идарисиниң башлиқи нур бәкри бейҗиңда ечиливатқан хәлқ қурултийида уйғур елиниң енергийәсини ечиш салмиқиниң зорайтилидиғанлиқини ейтқан. У, қурултайда мухбирларниң мәхсус зияритини қобул қилғанда уйғур елиниң енергийә ишләпчиқириштики чоң районлуқини әскәрткән вә дөләтлик енергийә идариси шинҗаңниң енергийәсини ечиш салмиқини зорайтиду, дегән.

Хитай һөкүмити шинҗаң хизмити йиғинидин кейин “һалқима тәрәққият” нами астида уйғур елидики байлиқ мәнбәлирини ечиш сүритини шиддәт билән ашуруш билән бирликтә көчмән йөткәшниму тезләткән иди. Хәлқарадики көзәткүчиләр буни уйғур елидики сиясий муқимсизлиқ вә екологийәлик тәңпуңсизлиқниң асаси, дәп көрситип хитай һөкүмитини агаһландуруп кәлмәктә.

Бирақ, нур бәкриниң сөзи хитай һөкүмитиниң бу чақириқларға қулақ салмиғанлиқини көрсәтмәктә. Уйғур елиниң сабиқ рәиси болған нур бәкри бу йилниң бешида хитай һөкүмити тәрипидин мәмликәтлик хәлқ қурултийи вәкили, дөләтлик тәрәққият-ислаһат комитетиниң муавин мудири, дөләтлик енергийә идарисиниң башлиқлиқ вәзиписигә тәйинләнгән.