Хитай даирилири уйғур аптоном райониниң сабиқ рәиси нур бәкрини тәптиш органлириниң бир тәрәп қилишиға тапшуруп беришни қарар қилған

Мухбиримиз әркин
2019-03-18
Share

Хитай һөкүмити уйғур аптоном райониниң сабиқ рәиси, хитай ислаһат-тәрәққият комитетиниң муавин мудири нур бәкрини партийәдин қоғлап чиқирип, вәзиписидин елип ташлашни, өзини тәптиш органлириниң бир тәрәп қилишиға тапшуруп беришни қарар қилған.

Көзәткүчиләрниң илгири сүрүшичә, әгәр нур бәкри сотланса, у уйғур аптоном райониниң 64 йиллиқ тарихида қануни җазаға тартилған тунҗи рәиси болуп қалидикән.

Бу йил 57 яшлиқ нур бәкри 2018‏-йили 20‏-сентәбир күни русийә зияритини ахирлаштуруп бейҗиң айродромиға қонғанда тутқун қилинған.

Шуниңдин бери униң ақивити һәққидә һечқандақ учур елан қилинип бақмиған иди. Лекин, хитай мәркизи интизам тәкшүрүш вә ревизийә комитетиниң 16‏-март күни ашкарилишичә, даириләр ахири уни тәптиш органиниң бир тәрәп қилишиға тапшуруп беришни қарар қилған.

Хоңкоңдики бәзи таратқулар илгири униң тутқун қилинишиниң уйғур аптоном районлуқ маарип назарити түзгән уйғур мәктәплириниң дәрслик китаби билән мунасивәтлик икәнликини илгири сүргән.

Хәвәрдә, маарип назаритиниң сабиқ назири саттар савутни өз ичигә алған дәрслик китаб түзүш гурупписидики уйғурларниң тутқун қилинғанлиқи, уларниң, дәрслик китаблирида пантүркизм идийәсини тәшвиқ қилиш билән әйибләнгәнлики тәкитләнгән иди. Лекин, хитай мәркизи интизам тәкшүрүш вә ревизийә комитетиниң уқтурушида, дәрслик китаб мәсилиси тилға елинмиған.

Уқтурушта униң «интизамға хилаплиқ қилип, аилисигә һәқсиз мәнпәәт сақлиғанлиқи, шамалға қарши йол тутқанлиқи, һәшәмәтлик зияпәтләргә чақирса барғанлиқи, совғат қобул қилғанлиқи, исрапхорлуқ қилғанлиқи, әхлақий чирикләшкәнлики вә тәшкилниң тәкшүрүшигә маслашмиғанлиқи. . . . . . .» Қатарлиқ қилмишларни садир қилғанлиқи илгири сүрүлгән.

Нур бәкриниң тутқун қилиниши муһаҗирәттики уйғурларда қаттиқ ғулғула қозғиған. Чүнки, у уйғур җәмийитидә хитай һөкүмитигә әң актип ишлигән уйғур әмәлдар, дәп қарилип кәлгән.

У «қош тил» маарипиниң омумлаштурулуп, уйғур тилиниң сиқип чиқирилиши, қәшқәр қәдимий шәһәр рәстилириниң чеқилип, уйғурларниң көчүрүлүши, «5 ‏-июл вәқәси» дики позитсийәси қатарлиқ амиллар сәвәблик уйғур җәмийитиниң қаттиқ наразилиқини қозғиған иди.

Кишилик һоқуқ тәшкилатлириниң илгири сүрүшичә, нур бәкриниң җазаға тартилиши хитайда һечқандақ уйғурниң бихәтәрлик әмәсликини көрситидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт