Шеняң шәһәрлик тәптиш мәһкимиси нур бәкриниң делоси үстидин әйибнамә сунған

Мухбиримиз сада
2019-05-08
Share

Хитай дөләтлик тәрәққият-ислаһат комитетиниң сабиқ муавин мудири, хитай дөләтлик енергийә идарисиниң сабиқ башлиқи, уйғур аптоном райониниң сабиқ рәиси нур бәкри бу йил 2-апрел күни «парахорлуқ вә чириклик» җинайити билән рәсмий қолға елинған иди. Йеқинда хитай мәмликәтлик алий тәптиш мәһкимисиниң көрсәтмиси билән лиявниң өлкисиниң шеняң шәһәрлик хәлқ тәптиш мәһкимиси шу җайдики оттура хәлқ сот мәһкимисигә нур бәкриниң делоси үстидин әйибнамә сунған.

«Хитай хәвәрлири» ториниң 8-майдики хәвиригә қариғанда, шеняң шәһәрлик тәптиш мәһкимиси сунған әйибнамидә нур бәкриниң илгири уйғур диярида вәзипә өтигән мәзгилидиму хизмәт қулайлиқидин пайдилинип қанунсиз пара елиш қилмиши билән шуғулланғанлиқи шикайәт қилинған. Әйибнамидә әйибләнгүчиниң җинайи ишлар җавабкарлиқиниң ахириғичә сүрүштә қилиниш керәклики тәкитләнгән.

Хәвәрдә дейилишичә, мәзкур әйибнамидә «нур бәкри уйғур аптоном районида вәзипә өтигән мәзгилидә, йәни үрүмчи шәһәрлик парткомниң муавин секретари, үрүмчи шәһириниң шәһәр башлиқи, уйғур аптоном районлуқ парткомниң даимий һәйәт әзаси, уйғур аптоном районлуқ хәлқ һөкүмитиниң рәиси вә кейинчә хитай дөләтлик енергийә идарисиниң башлиқи болуп турған мәзгиллиридә хизмәт қулайлиқидин пайдилинип ғайәт зор соммида пара йегәнлики вә чирикләшкәнлики санап өтүлгән вә қанун бойичә униң җинайи җавабкарлиқиниң сүрүштүрүлүши» тәләп қилинған.

Муһаҗирәттики көзәткүчиләрниң билдүрүшичә, нурбәкридәк хитайниң әң юқири һакимийәт қатлимида һоқуқ тутқан бир әмәлдарниң қолға елиниши вә униң үстидин юқириқидәк әйибнаминиң сунулуши хитай компартийәсиниң райондики һечбир уйғурға ишәнмәйдиғанлиқиниң ярқин бир мисали икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт