Хитай дөләтлик енергийә идарисиниң башлиқи нур бәкри тутуп турулуп тәкшүрүлмәктикән

Мухбиримиз сада
2018-09-21
Share

Хитай тәрәққият вә ислаһат комитетиниң муавин мудири, хитай дөләтлик енергийә идарисиниң башлиқи, уйғур аптоном райониниң сабиқ рәиси нур бәкриниң «интизамға еғир дәриҗидә хилаплиқ қилиш» қилмиши билән әйиблинип, тутуп туруп тәкшүрүлүватқанлиқи хәвәр қилинмақта.

Бүгүн, йәни 21-сентәбир күни хитай һөкүмәт таратқулири хәвәр берип, хитайниң юқири дәриҗилик уйғур әмәлдари нур бәкриниң «интизамға еғир дәриҗидә хилаплиқ қилиш» қилмиши билән тәкшүрүлүватқанлиқини елан қилди. Бүгүн йәнә хәлқарадики даңлиқ ахбарат васитилиридин «вал-стрет журнили», «вашингтон почтиси» қатарлиқ гезитләрдиму нур бәкриниң тутуп турулуп тәкшүрүлүватқанлиқи арқа-арқидин хәвәр қилинди.

Нур бәкри әслидә шинҗаң университети иттипақ комитетиниң секретарлиқидин тәдриҗий өстүрүлүп, үрүмчи шәһириниң башлиқи, уйғур аптоном районлуқ парткомниң муавин секретари, уйғур аптоном райониниң рәиси қатарлиқ вәзипиләрни өтигән һәмдә хитай һөкүмитиниң уйғур дияридики бир қатар миллий ассимилятсийә сиясәтлирини иҗра қилишта маслашқан. У 2014-йили хитай дөләтлик тәрәққият вә ислаһат комитетиниң муавин мудири, хитай дөләтлик енергийә идарисиниң башлиқлиқиға тәйинлинип бейҗиңға йөткәлгән. Нур бәкридин ибарәт хитай компартийәсиниң әң юқири һакимийәт чәмбирикигә киргән бундақ бир шәхсниң тутуп турулуп тәкшүрүлүши хитай вә хәлқарада күчлүк инкас қозғимақта.

«Вашингтон почтиси» гезитидә дейилишичә, нур бәкриниң исми 21-сентәбир чүштин кейин хитай дөләтлик енергийә идарисиниң тор бетидин өчүрүветилгән.

Нур бәкри уйғур аптоном райониниң рәиси болуп вәзипә өтәватқан мәзгилдә хитай һөкүмитиниң уйғур вә башқа йәрлик милләтләргә қаратқан бир йүрүш бастуруш вә еритип түгитиш сиясәтлиригә актиплиқ билән маслашқан. Болупму у хитайниң районда аталмиш «қош тиллиқ» маарипини йолға қоюшта асаслиқ рол ойниған.

Чәтәлләрдики уйғур көзәткүчиләр нур бәкриниң тутулуши хитай даирилириниң һәрқандақ бир уйғурға, мәйли у уйғур хәлқи үчүн хизмәт қилған яки хитай үчүн кәтмән чапқан болушидин қәтий нәзәр, һәммисиниңла йоқитилиш нишаниға айланғанлиқини көрситип бериду, дәп қаримақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт