Xitay döletlik énérgiye idarisining bashliqi nur bekri tutup turulup tekshürülmektiken

Muxbirimiz sada
2018-09-21
Share

Xitay tereqqiyat we islahat komitétining mu'awin mudiri, xitay döletlik énérgiye idarisining bashliqi, Uyghur aptonom rayonining sabiq re'isi nur bekrining "Intizamgha éghir derijide xilapliq qilish" qilmishi bilen eyiblinip, tutup turup tekshürülüwatqanliqi xewer qilinmaqta.

Bügün, yeni 21-séntebir küni xitay hökümet taratquliri xewer bérip, xitayning yuqiri derijilik Uyghur emeldari nur bekrining "Intizamgha éghir derijide xilapliq qilish" qilmishi bilen tekshürülüwatqanliqini élan qildi. Bügün yene xelq'aradiki dangliq axbarat wasitiliridin "Wal-strét zhurnili", "Washin'gton pochtisi" qatarliq gézitlerdimu nur bekrining tutup turulup tekshürülüwatqanliqi arqa-arqidin xewer qilindi.

Nur bekri eslide shinjang uniwérsitéti ittipaq komitétining sékrétarliqidin tedrijiy östürülüp, ürümchi shehirining bashliqi, Uyghur aptonom rayonluq partkomning mu'awin sékrétari, Uyghur aptonom rayonining re'isi qatarliq wezipilerni ötigen hemde xitay hökümitining Uyghur diyaridiki bir qatar milliy assimilyatsiye siyasetlirini ijra qilishta maslashqan. U 2014-yili xitay döletlik tereqqiyat we islahat komitétining mu'awin mudiri, xitay döletlik énérgiye idarisining bashliqliqigha teyinlinip béyjinggha yötkelgen. Nur bekridin ibaret xitay kompartiyesining eng yuqiri hakimiyet chembirikige kirgen bundaq bir shexsning tutup turulup tekshürülüshi xitay we xelq'arada küchlük inkas qozghimaqta.

"Washin'gton pochtisi" gézitide déyilishiche, nur bekrining ismi 21-séntebir chüshtin kéyin xitay döletlik énérgiye idarisining tor bétidin öchürüwétilgen.

Nur bekri Uyghur aptonom rayonining re'isi bolup wezipe ötewatqan mezgilde xitay hökümitining Uyghur we bashqa yerlik milletlerge qaratqan bir yürüsh basturush we éritip tügitish siyasetlirige aktipliq bilen maslashqan. Bolupmu u xitayning rayonda atalmish "Qosh tilliq" ma'aripini yolgha qoyushta asasliq rol oynighan.

Chet'ellerdiki Uyghur közetküchiler nur bekrining tutulushi xitay da'irilirining herqandaq bir Uyghurgha, meyli u Uyghur xelqi üchün xizmet qilghan yaki xitay üchün ketmen chapqan bolushidin qet'iy nezer, hemmisiningla yoqitilish nishanigha aylan'ghanliqini körsitip béridu, dep qarimaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet