Нур бәкри өмүрлүк қамақ җазасиға һөкүм қилинған

Мухбиримиз ирадә
2019-12-02
Share

Хитай дөләтлик тәрәққият-ислаһат комитетиниң сабиқ муавин мудири, хитай дөләтлик енергийә идарисиниң сабиқ башлиқи вә уйғур аптоном райониниң сабиқ рәиси нур бәкри муддәтсиз қамақ җазасиға һөкүм қилинған.

Хитайниң һәрқайси һөкүмәт таратқулири тәрипидин тарқитилған учурларға қариғанда, нур бәкриниң сот һөкүми 2-декабир күни лявниң өлкиси шеняң шәһәрлик оттура сот мәһкимиси тәрипидин елан қилинған. Парихорлуқ җинайити билән әйиблинип муддәтсиз қамақ җазасиға һөкүм қилинған нур бәкри сиясий һоқуқидин мәһрум қилинип, барлиқ мал-мүлки мусадирә қилинған.

Хитай таратқулири хәвәрлиридә нур бәкриниң сот һөкүмигә рази болғанлиқи вә юқириға әрз сунмайдиғанлиқини қәйт қилған.

Бу йил 57 яшқа киргән нур бәкри 2018‏-йили 20‏-сентәбир күни русийәдики рәсмий зияритини ахирлаштуруп, хитайға қайтқинида бейҗиң айродромида тутқун қилинған. Хитай мәркизи интизам тәкшүрүш вә ревизийә комитети нур бәкри тутқун қилинип, аридин 6 ай өткәндин кейин, йәни2019-йили 16‏-март күни тунҗи қетим хәвәр елан қилип, нур бәкриниң «партийә интизамиға еғир дәриҗидә хилаплиқ қилиш» қилмиши билән тәптиш органлириниң бир тәрәп қилишиға тапшуруп берилгәнликини җакарлиған.

Арқидин, бу йил 7-айда шеняң шәһәрлик сот мәһкимисидә сот ечилип, нур бәкри парихорлуқ җинайити билән әйибләнгәниди. Сотта униң 1998-йили үрүмчи шәһириниң башлиқи болғандин таки 2018-йили хитай дөләтлик енергийә идарисиниң башлиқи болғанға қәдәр 20 йиллиқ җәрянда 79 милйон йүән, йәни 11 милйон доллардин артуқ пара йегәнлики илгири сүрүлгән. Уйғур юқири қатлам әмәлдарлири ичидә хитай һөкүмити үчүн әң актип хизмәт қилған әмәлдар дәп қарилип кәлгән нур бәкриниң ақивити муһаҗирәттики уйғурларда қаттиқ ғулғула қозғиди. Хитай һөкүмитиниң уйғур елидә йүргүзүватқан сиясәтлиригә қарита тәнқидий пикирдә болғанлиқи үчүн хитай һөкүмити тәрипидин өмүрлүк қамақ җазасиға һөкүм қилинған уйғур зиялийси илһам тохти билән хитай һакимийити үчүн садиқлиқ билән вәзипә атқурған нур бәкриниң охшаш қисмәткә дучар болуши диққәт қозғайдикән.

Чәтәлләрдики бир қисим уйғур көзәткүчилири болса нур бәкриниң җазалинишиниң уйғур аптоном районлуқ маарип назарити түзгән уйғур оттура мәктәплириниң «әдәбият» дәрслики билән мунасивәтлик икәнликини илгири сүрүшмәктә. Мәлум болушичә, хитай даирилири уйғур әдәбият дәрслик материяллирида бөлгүнчиликни тәрғиб қилиш җинайити билән абдуразақ сайим, ялқун рози вә башқа бир қисим уйғур әмәлдарлири һәм зиялийлирини қолға алған вә қамақ җазалириға мәһкум қилғаниди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт