Nur bekri ömürlük qamaq jazasigha höküm qilin'ghan

Muxbirimiz irade
2019-12-02
Élxet
Pikir
Share
Print

Xitay döletlik tereqqiyat-islahat komitétining sabiq mu'awin mudiri, xitay döletlik énérgiye idarisining sabiq bashliqi we Uyghur aptonom rayonining sabiq re'isi nur bekri muddetsiz qamaq jazasigha höküm qilin'ghan.

Xitayning herqaysi hökümet taratquliri teripidin tarqitilghan uchurlargha qarighanda, nur bekrining sot hökümi 2-dékabir küni lyawning ölkisi shényang sheherlik ottura sot mehkimisi teripidin élan qilin'ghan. Parixorluq jinayiti bilen eyiblinip muddetsiz qamaq jazasigha höküm qilin'ghan nur bekri siyasiy hoquqidin mehrum qilinip, barliq mal-mülki musadire qilin'ghan.

Xitay taratquliri xewerliride nur bekrining sot hökümige razi bolghanliqi we yuqirigha erz sunmaydighanliqini qeyt qilghan.

Bu yil 57 yashqa kirgen nur bekri 2018‏-yili 20‏-séntebir küni rusiyediki resmiy ziyaritini axirlashturup, xitaygha qaytqinida béyjing ayrodromida tutqun qilin'ghan. Xitay merkizi intizam tekshürüsh we réwiziye komitéti nur bekri tutqun qilinip, aridin 6 ay ötkendin kéyin, yeni2019-yili 16‏-mart küni tunji qétim xewer élan qilip, nur bekrining "Partiye intizamigha éghir derijide xilapliq qilish" qilmishi bilen teptish organlirining bir terep qilishigha tapshurup bérilgenlikini jakarlighan.

Arqidin, bu yil 7-ayda shényang sheherlik sot mehkimiside sot échilip, nur bekri parixorluq jinayiti bilen eyiblen'genidi. Sotta uning 1998-yili ürümchi shehirining bashliqi bolghandin taki 2018-yili xitay döletlik énérgiye idarisining bashliqi bolghan'gha qeder 20 yilliq jeryanda 79 milyon yüen, yeni 11 milyon dollardin artuq para yégenliki ilgiri sürülgen. Uyghur yuqiri qatlam emeldarliri ichide xitay hökümiti üchün eng aktip xizmet qilghan emeldar dep qarilip kelgen nur bekrining aqiwiti muhajirettiki Uyghurlarda qattiq ghulghula qozghidi. Xitay hökümitining Uyghur élide yürgüzüwatqan siyasetlirige qarita tenqidiy pikirde bolghanliqi üchün xitay hökümiti teripidin ömürlük qamaq jazasigha höküm qilin'ghan Uyghur ziyaliysi ilham toxti bilen xitay hakimiyiti üchün sadiqliq bilen wezipe atqurghan nur bekrining oxshash qismetke duchar bolushi diqqet qozghaydiken.

Chet'ellerdiki bir qisim Uyghur közetküchiliri bolsa nur bekrining jazalinishining Uyghur aptonom rayonluq ma'arip nazariti tüzgen Uyghur ottura mekteplirining "Edebiyat" dersliki bilen munasiwetlik ikenlikini ilgiri sürüshmekte. Melum bolushiche, xitay da'iriliri Uyghur edebiyat derslik matériyallirida bölgünchilikni terghib qilish jinayiti bilen abdurazaq sayim, yalqun rozi we bashqa bir qisim Uyghur emeldarliri hem ziyaliylirini qolgha alghan we qamaq jazalirigha mehkum qilghanidi.

Toluq bet