Уйғур райониниң сабиқ рәислиридин нур бәкри рәсмий қолға елинди

Мухбиримиз ирадә
2019-04-02
Share

Хитай дөләтлик тәрәққият-ислаһат комитети муавин мудири, хитай дөләтлик енергийә идариси башлиқи вә уйғур аптоном райониниң сабиқ рәиси нур бәкри рәсмий қолға елинған. 2-Апрел күни хитайниң алий хәлқ тәптиш мәһкимиси тор бети вә хәлқ тори қатарлиқлар бирдәк, нур бәкри үстидин «пара елиш» җинайити билән қолға елиш қарарини чиқирилғанлиқини хәвәр қилди.

Бу йил 57 яшлиқ нур бәкри 2018‏-йили 20‏-сентәбир күни русийәдики рәсмий зияритини ахирлаштуруп бейҗиң айродромиға қонғанда тутқун қилинған. Таки бу йил 16-мартқичә хитай даирилири нур бәкри һәққидә һечқандақ учур елан қилмиған иди. 

Хитай мәркизи интизам тәкшүрүш вә ревизийә комитети 16‏-март күни нур бәкриниң партийә интизамиға еғир дәриҗидә хилаплиқ қилиш гумани билән тәптиш оргининиң бир тәрәп қилишиға тапшуруп берилгәнликини җакарлиған. 

Уқтурушта униң «интизамға хилаплиқ қилғанлиқи, шамалға қарши йол тутқанлиқи, һәшәмәтлик зияпәтләргә чақирса барғанлиқи, совғат қобул қилғанлиқи, исрапхорлуқ қилғанлиқи, әхлақий чирикләшкәнлики вә тәшкилниң тәкшүрүшигә маслашмиғанлиқи. . . . . . .» Қатарлиқ қилмишларни садир қилғанлиқи илгири сүрүлгән. 

Бирақ, хоңкоңдики бәзи таратқулар бу һәқтики хәвәрлиридә, нур бәкриниң тутқун қилинишиниң уйғур аптоном районлуқ маарип назарити түзгән уйғур мәктәплириниң дәрслик китаби билән мунасивәтлик икәнликини илгири сүргән. 

Хәвәрдә, маарип назаритиниң сабиқ назири саттар савутни өз ичигә алған дәрслик китаб түзүш гурупписидики уйғурларниң тутқун қилинғанлиқи, уларниң, дәрслик китаблирида пантүркизм идийисини тәшвиқ қилиш билән әйибләнгәнлики тәкитләнгән иди. Лекин, хитай мәркизи интизам тәкшүрүш вә ревизийә комитетиниң уқтурушида, дәрслик китаб мәсилиси тилға елинмиған. 

Нур бәкриниң тутқун қилиниши муһаҗирәттики уйғурларда қаттиқ ғулғула қозғиди. Чүнки, у уйғур җәмийитидә хитай һөкүмити үчүн әң актип хизмәт қилған уйғур әмәлдар, дәп қарилип кәлгән. Чәтәлләрдики уйғур көзәткүчиләр хитайниң әйибләшлириниң орамидин қариғанда нур бәкриниң еғир җазалиниши мумкинликини пәрәз қилишмақта. 

Кишилик һоқуқ тәшкилатлириниң илгири сүрүшичә, нур бәкриниң җазаға тартилиши хитайда һечқандақ уйғурниң бихәтәр әмәсликини көрситидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт