Uyghur rayonining sabiq re'isliridin nur bekri resmiy qolgha élindi

Muxbirimiz irade
2019-04-02
Share

Xitay döletlik tereqqiyat-islahat komitéti mu'awin mudiri, xitay döletlik énérgiye idarisi bashliqi we Uyghur aptonom rayonining sabiq re'isi nur bekri resmiy qolgha élin'ghan. 2-Aprél küni xitayning aliy xelq teptish mehkimisi tor béti we xelq tori qatarliqlar birdek, nur bekri üstidin "Para élish" jinayiti bilen qolgha élish qararini chiqirilghanliqini xewer qildi.

Bu yil 57 yashliq nur bekri 2018‏-yili 20‏-séntebir küni rusiyediki resmiy ziyaritini axirlashturup béyjing ayrodromigha qon'ghanda tutqun qilin'ghan. Taki bu yil 16-martqiche xitay da'iriliri nur bekri heqqide héchqandaq uchur élan qilmighan idi. 

Xitay merkizi intizam tekshürüsh we réwiziye komitéti 16‏-mart küni nur bekrining partiye intizamigha éghir derijide xilapliq qilish gumani bilen teptish orginining bir terep qilishigha tapshurup bérilgenlikini jakarlighan. 

Uqturushta uning "Intizamgha xilapliq qilghanliqi, shamalgha qarshi yol tutqanliqi, heshemetlik ziyapetlerge chaqirsa barghanliqi, sowghat qobul qilghanliqi, israpxorluq qilghanliqi, exlaqiy chirikleshkenliki we teshkilning tekshürüshige maslashmighanliqi. . . . . . ." qatarliq qilmishlarni sadir qilghanliqi ilgiri sürülgen. 

Biraq, xongkongdiki bezi taratqular bu heqtiki xewerliride, nur bekrining tutqun qilinishining Uyghur aptonom rayonluq ma'arip nazariti tüzgen Uyghur mekteplirining derslik kitabi bilen munasiwetlik ikenlikini ilgiri sürgen. 

Xewerde, ma'arip nazaritining sabiq naziri sattar sawutni öz ichige alghan derslik kitab tüzüsh guruppisidiki Uyghurlarning tutqun qilin'ghanliqi, ularning, derslik kitablirida pantürkizm idiyisini teshwiq qilish bilen eyiblen'genliki tekitlen'gen idi. Lékin, xitay merkizi intizam tekshürüsh we réwiziye komitétining uqturushida, derslik kitab mesilisi tilgha élinmighan. 

Nur bekrining tutqun qilinishi muhajirettiki Uyghurlarda qattiq ghulghula qozghidi. Chünki, u Uyghur jem'iyitide xitay hökümiti üchün eng aktip xizmet qilghan Uyghur emeldar, dep qarilip kelgen. Chet'ellerdiki Uyghur közetküchiler xitayning eyibleshlirining oramidin qarighanda nur bekrining éghir jazalinishi mumkinlikini perez qilishmaqta. 

Kishilik hoquq teshkilatlirining ilgiri sürüshiche, nur bekrining jazagha tartilishi xitayda héchqandaq Uyghurning bixeter emeslikini körsitidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.