Нури түркәл «заман» журнили тәрипидин «дуняда тәсири бар 100 мәшһур шәхс» тизимликидин орун алди

Мухбиримиз җәвлан
2020-09-23
Елхәт
Пикир
Share
Принт

Америка хәлқарадиний әркинлик комитети тор бетиниң 22-сентәбир елан қилишичә, мәзкур комитетниң комиссари нури түркәл «дәвр» һәптилик журнилиниң 2020-йиллиқ «дуняда тәсири бар 100 мәшһур шәхс» тизимликигә киргүзүлгән. Нури түркәл 2020-йил 5-айда америка авам палатасиниң башлиқи нәнси пелоси тәрипидин америка хәлқара диний әркинлик комитетиниң комиссарлиқиға тәйинләнгәниди.

Мәзкур тор бетидә нури түркәлгә юқири баһалар берилгән болуп, америка хәлқара диний әркинлик комитетиниң муавин рәиси тони перкинс (Tony Perkins) мундақ дегән: «дәвр журнили йүз мәшһур шәхс тизимликигә нури түркәлни киргүзүп тоғра қилди. Чүнки у билимлик һәм зерәк, униң мол тәҗрибиси вә диний әркинликни қоғдаш җәһәттә қиливатқан ишлири һәқиқәтән тәқдирләшкә лайиқ. У уйғур мусулманлириниң хитай вә башқа дөләтләрдики қийин әһвалини башқиларға билдүрди, шундақла хитай коммунистлири уйғурларға етник қирғинчилиқ йүргүзүватқан әһвалда дунядики сиясәтләрниң хитайға қарши йосунда өзгиришигә түрткә болди».

Мәзкур тор бетидә йәнә нури түркәлниң бир уйғур адвокат болуш сүпити билән йиллардин буян җәмийәт үчүн һармай-талмай хизмәт қилип кәлгәнлики, уйғур кишилик һоқуқ һәрикити қозғиғанлиқи, йүзлигән кишиниң америкада панаһлинишиға ярдәм бәргәнлики, көплигән сиясий муһакимә вә испат аңлаш йиғинлирида өз ролини җари қилдурғанлиқи, хитай өз җинайитини бар күчи билән йошурған әһвалда уйғурлар учриған зулумни дуняға аңлитип, хәлқараниң диққитини қозғаш үчүн күч чиқарғанлиқи қатарлиқ нуқтилар алаһидә тилға елинған.

«Дәвр» һәптилик журнили йиллардин буян 100 мәшһур шәхс тизимликини елан қиливатқан болуп, бу қетимқиси 17-қетимлиқ тизимлик икән. Улар һәр йили дуняниң һәр қайси җайлиридики әң паалийәтчан, әң иҗадкар, әң мувәппәқийәт қазанған вә башқиларға тәсир көрситәлигән шәхсләрни таллап елан қилидикән, тәқдирләйдикән һәмдә бу арқилиқ кишиләргә илһам беришни мәқсәт қилидикән. «Дәвр» журнили 2020-йил 10-айниң 5-күни толуқ тизимликни елан қилидикән.

Пикирләр (0)
Share
Толуқ бәт