Nuri türkel "Zaman" zhurnili teripidin "Dunyada tesiri bar 100 meshhur shexs" tizimlikidin orun aldi

Muxbirimiz jewlan
2020-09-23
Élxet
Pikir
Share
Print

Amérika xelq'aradiniy erkinlik komitéti tor bétining 22-séntebir élan qilishiche, mezkur komitétning komissari nuri türkel "Dewr" heptilik zhurnilining 2020-yilliq "Dunyada tesiri bar 100 meshhur shexs" tizimlikige kirgüzülgen. Nuri türkel 2020-yil 5-ayda amérika awam palatasining bashliqi nensi pélosi teripidin amérika xelq'ara diniy erkinlik komitétining komissarliqigha teyinlen'genidi.

Mezkur tor bétide nuri türkelge yuqiri bahalar bérilgen bolup, amérika xelq'ara diniy erkinlik komitétining mu'awin re'isi toni pérkins (Tony Perkins) mundaq dégen: "Dewr zhurnili yüz meshhur shexs tizimlikige nuri türkelni kirgüzüp toghra qildi. Chünki u bilimlik hem zérek, uning mol tejribisi we diniy erkinlikni qoghdash jehette qiliwatqan ishliri heqiqeten teqdirleshke layiq. U Uyghur musulmanlirining xitay we bashqa döletlerdiki qiyin ehwalini bashqilargha bildürdi, shundaqla xitay kommunistliri Uyghurlargha étnik qirghinchiliq yürgüzüwatqan ehwalda dunyadiki siyasetlerning xitaygha qarshi yosunda özgirishige türtke boldi".

Mezkur tor bétide yene nuri türkelning bir Uyghur adwokat bolush süpiti bilen yillardin buyan jem'iyet üchün harmay-talmay xizmet qilip kelgenliki, Uyghur kishilik hoquq herikiti qozghighanliqi, yüzligen kishining amérikada panahlinishigha yardem bergenliki, köpligen siyasiy muhakime we ispat anglash yighinlirida öz rolini jari qildurghanliqi, xitay öz jinayitini bar küchi bilen yoshurghan ehwalda Uyghurlar uchrighan zulumni dunyagha anglitip, xelq'araning diqqitini qozghash üchün küch chiqarghanliqi qatarliq nuqtilar alahide tilgha élin'ghan.

"Dewr" heptilik zhurnili yillardin buyan 100 meshhur shexs tizimlikini élan qiliwatqan bolup, bu qétimqisi 17-qétimliq tizimlik iken. Ular her yili dunyaning her qaysi jayliridiki eng pa'aliyetchan, eng ijadkar, eng muweppeqiyet qazan'ghan we bashqilargha tesir körsiteligen shexslerni tallap élan qilidiken, teqdirleydiken hemde bu arqiliq kishilerge ilham bérishni meqset qilidiken. "Dewr" zhurnili 2020-yil 10-ayning 5-küni toluq tizimlikni élan qilidiken.

Toluq bet