Нури түркәл “явро-асия тәқризи” дә мақалә елан қилип, американи уйғурлар мәсилисидә җиддий тәдбирләрни елишқа чақирған

Мухбиримиз әркин
2021.05.25

Америка хәлқара диний әркинлик комитетиниң комиссари нури түркәл 25-май “явро-асия тәқризи” торида мақалә елан қилип, американи уйғурлар учриған “ирқий қирғинчилиқ” қа қарши җиддий тәдбирләрни елишқа чақирған. Униң тәкитлишичә, хитайниң уйғур вә башқа түркий мусулманларға қаратқан системилиқ, көп қирлиқ ирқий қирғинчилиқ сиясити йеңи басқучқа киргән болуп, әгәр җиддий тәдбир елинмиса, “‍өз вәтинидә уйғур, дәп тәсвирләшкә болидиған һәрқандақ нәрсә пат арида қуруқ шәкилгә айлинип қалидикән.”

Нури түркәл “ирқий қирғинчилиқ вә ирқий қирғинчилиқни ‍инкар қилиш” мавзулиқ мақалисидә “21-әсирдики кишини һәйран қалдуридиған бу ирқий қирғинчилиққа хәлқара инкасниң йетәрлик болмаслиқи түпәйли униң алиқачан реалиққа айлиниватқанлиқи” ни билдүргән.

Униң ейтишичә, хитай һөкүмити “ирқий қирғинчилиқ” қилипла қалмай, уни пүтүн күчи билән инкар қилип, дунядин ‍өзиниң һәркитини махташни тәләп қилмақтикән, шундақла уйғурларни камера ‍алдида нахша ейтқузуп, уссул ойнитип, хитайға қарши тәнқидләрни ‍әйиблитип, ирқий қирғинчилиққа қатнишишқа мәҗбурлимақта” икән.

Нури түркәл американиң “уйғур мәҗбури әмгикини чәкләш”, “уйғур кишилик һоқуқни қоғдаш” қанун лайиһәлирини өз ичигә алған уйғурларға алақидар қанун вә қарарнамиләрни тез мақуллиши, “ирқий қирғинчилиқниң алдини елиш әһдинамиси” ға имза қойған дөләтләрни әһдинамидики мәҗбурийитини ада қилишқа үндиши, уйғур мусапирлирини қоғдиши, сиясий панаһлиқ тилигүчиләрниң рәсмийитини тезлитиши, рәқәмлик диктатурлиққа қарши туруп, америка ширкәтлириниң ‍ирқий қирғинчилиқтики ролини тәкшүрүши қатарлиқларни тәләп қилған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.