Yazghuchi nurmuhemmed toxtining wapati chet'el axbaratliridimu zor diqqet qozghidi

Muxbirimiz eziz
2019-06-25
Élxet
Pikir
Share
Print

Hazirqi zaman Uyghur edebiyatidiki ülgilik yazghuchilardin nurmuhemmed toxtining bu yil mart éyida lagérdin chiqip birnechche ay ötmeyla sirliq halda ölüp kétishi chet'el axbarat wasitiliridimu köplep xewer qilindi. Kanadadiki eng chong xewer agéntliqining biri bolghan "Kanada radiyo shirkiti" ning bu heqtiki mexsus ziyaret xatirisidin kéyin "Yer shari we pochta" géziti 24-iyun küni bu heqte tepsiliy xewer ishlidi.

Bu xewerlerde xitay hökümiti izchil "Esebiylik we térrorluq idiyeliri bilen yuqumlan'ghan kishilerni heqsiz dawalaydighan mektep" dep teshwiq qiliwatqan, shundaqla milyonlap Uyghurni qamiwalghan lagérlarning qandaq jay ikenliki yene bir qétim eskertildi. Bolupmu éghir késelge giriptar bolghan, yéshi 70 ke barghan, "Esebiylik" yaki "Térrorluq" bilen héchqandaq alaqisi bolmighan bir moysipitni "Tirik élip kétip, ölükini chiqirip bergen" qabahetlik hadisidin hazir Uyghur jem'iyitini éghir wehimige séliwatqan lagérlardiki paji'elerning bir burjikini körüwélish mumkin ikenliki körsitildi.

Bu xewer we maqalilerde alahide eskertilgen yene bir nuqta nurmuhemmed toxtigha oxshash Uyghurlarning chongqur hörmitige érishken bir yazghuchining nishanliq hujum obyékti bolushida Uyghurlarning awazini pütünley öchürüwétish urunushiningmu muhim orun tutidighanliqi bolghan. Shundaqla nurmuhemmed toxtining bir qisim nadir eserlirining Uyghur oqurmenliri ichide zor tesir qozghighanliqi eslep ötülgen.

Gherb oqurmenlirige Uyghurlarning hazir qandaq bir shara'itta mewjut boluwatqanliqini teswirlep bérish üchün bu eserlerde méyit igilirining depne murasimi üchün yurtigha bérish imkanigha ige emesliki, mushundaq bir ölüm xewirining ay-aylap bésilip qélishi, hetta jan üzgen kishining qachan we qeyerde ölüp ketkenlikini sorash imkaniyitiningmu yoqluqi qatarliq tepsilatlar bérilgen.

Toluq bet