Prézidént obama isra'iliye bilen pelestinni ixtilapni bir chetke qayrip qoyup söhbet ötküzüshke chaqirdi

Muxbirimiz erkin
2013-03-21
Share

Prézidént obama isra'iliye bilen pelestinni aldi bilen ixtilapni hel qilip, andin söhbet ötküzüshni kütüp turmay, ixtilapni bir chetke qayrip qoyup, talash - tartishtiki yadroliq mesililerde söhbet ötküzüshke chaqirdi.

Prézidént obama bu sözlerni peyshenbe küni ramallani ziyaret qilip, pelestin rehbiri abbas bilen axbarat yighini ötküzgende qildi. Obamaning ottura sherq ziyariti isra'iliyedin bashlan'ghan. U peyshenbe küni isra'iliyelik yashlargha nutuq sözlep, isra'iliyening bixeterliki tehditke uchrisa uning yalghuz emeslikini, biraq pelestin bilen tinchliq hasil qilish isra'iliye bixeterlikining birdin bir yoli ikenlikini bildürdi. Isra'iliye peqet musteqil we heqiqiy bir pelestin dölitini qobul qilghandila, özining yehudi we démokratik dölet bolush xasliqini saqlap qalalaydighanliqini ilgiri sürdi.

Pelestin rehbiri abbas isra'iliye sherqiy érusalim we i'ordan deryasining gherbiy qirghiqida yehudi köchmenler mehellisi qurushni toxtatsa, andin uning bilen tinchliq söhbiti élip baridighanliqini eskertip kelgen. Biraq isra'iliye bash ministiri nétanyaxu, söhbetke aldinqi shert qoshmasliqni telep qilip keldi. U bu qétimmu prézidént obama bilen ötküzgen axbarat yighinida yene aldinqi shert qoshmasliqni telep qildi. Lékin abbas axbarat élan qilish yighinida isra'iliyening sherqiy érusalim we gherbiy qirghaqtiki köchmenler mehelle qurulushining qanunsiz ikenlikini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet