Уйғур дияридики "очуқ университет" лар гуман қозғимақта

Мухбиримиз әзиз
2021-09-28
Share

Йеқиндин буян уйғур дияридики һәрқайси вилайәт вә шәһәрләрдә тәңла ечилишқа башлиған "очуқ университет" лар хитай ахбаратлирида бәс-бәстә "юқири сүпәтлик маарип" қурулушиниң нәмунилири сүпитидә тонуштурулуватқанлиқи мәлум.

Хитай һөкүмити башқурушидики "шинҗаң хәвәрлири тори" ниң йеқинқи хәвәрлиридин мәлум болушичә, нөвәттә алтай, қумул, бортала, турпан, или қатарлиқ вилайәт вә шәһәрләрдә шу җайниң намида аталған "очуқ университет" лар қурулғанлиқини җакарлиған һәмдә йопуқ ечиш мурасимлири өткүзгән. Мурасимға шу җайниң партийә вә һөкүмәт башлиқлири толуқ қатнашқан. Хәвәрдин мәлум болушичә, бу "очуқ университетлар" илгири һәрқайси шәһәр вә вилайәтләрдики радийо-телевизийә университетлири асасида кеңәйтип қурулған. Кейинки қәдәмдә һәрқайси наһийәләрдә буниң тармақ мәктәплири қурулидикән. Қумул шәһәрлик һөкүмәтниң бу һәқтики мәхсус уқтурушида "қумул очуқ университети адаққичә өгинишни қиблинамә қилған, тор билән маарип бирләшкән йеңичә алий мәктәп" дейилиду.

Хәвәрдә алаһидә қилип бу университетларниң илгирики вақитларда "җәмийәт тәрәққияти үчүн көплигән ихтисаслиқ кишиләрни тәрбийәләп бәргәнлики, бундин кейинму бу һалниң давам қилидиғанлиқи тәкитлиниду. Әмма муһаҗирәттики анализчилар бу хилдики "очуқ университетлар" ға қоюлған "очуқ" дегән сүпәт сөзидин әндишә қиливатқанлиқини билдүрүш билән биргә буниң уйғур җәмийитигә йәнә қандақ мәсилиләрни елип келишигә бирнәрсә дегили болмайдиғанлиқини алаһидә тәкитләйду. Америкадики мустәқил анализчи илшат һәсән бу тоғрисида пикир қилип: "хитай һөкүмити таки йеқинқи мәзгилләргичә мудһишқа толған лагерларни ‹кәспий тәрбийәләш мәркизи' дегән чирайлиқ намда атиған иди. Әмдиликтә йеңидин нам қоюлған бу мәктәпләрниң бу хилдики уйғур җәмийитини ‹қайта қуруш' қурулушиға қандақ хизмәт қилишиға бирнәрсә дегили болмайду" деди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт