Uyghur diyaridiki "Ochuq uniwérsitét" lar guman qozghimaqta

Muxbirimiz eziz
2021-09-28
Share

Yéqindin buyan Uyghur diyaridiki herqaysi wilayet we sheherlerde tengla échilishqa bashlighan "Ochuq uniwérsitét" lar xitay axbaratlirida bes-beste "Yuqiri süpetlik ma'arip" qurulushining nemuniliri süpitide tonushturuluwatqanliqi melum.

Xitay hökümiti bashqurushidiki "Shinjang xewerliri tori" ning yéqinqi xewerliridin melum bolushiche, nöwette altay, qumul, bortala, turpan, ili qatarliq wilayet we sheherlerde shu jayning namida atalghan "Ochuq uniwérsitét" lar qurulghanliqini jakarlighan hemde yopuq échish murasimliri ötküzgen. Murasimgha shu jayning partiye we hökümet bashliqliri toluq qatnashqan. Xewerdin melum bolushiche, bu "Ochuq uniwérsitétlar" ilgiri herqaysi sheher we wilayetlerdiki radiyo-téléwiziye uniwérsitétliri asasida kéngeytip qurulghan. Kéyinki qedemde herqaysi nahiyelerde buning tarmaq mektepliri qurulidiken. Qumul sheherlik hökümetning bu heqtiki mexsus uqturushida "Qumul ochuq uniwérsitéti adaqqiche öginishni qibliname qilghan, tor bilen ma'arip birleshken yéngiche aliy mektep" déyilidu.

Xewerde alahide qilip bu uniwérsitétlarning ilgiriki waqitlarda "Jem'iyet tereqqiyati üchün köpligen ixtisasliq kishilerni terbiyelep bergenliki, bundin kéyinmu bu halning dawam qilidighanliqi tekitlinidu. Emma muhajirettiki analizchilar bu xildiki "Ochuq uniwérsitétlar" gha qoyulghan "Ochuq" dégen süpet sözidin endishe qiliwatqanliqini bildürüsh bilen birge buning Uyghur jem'iyitige yene qandaq mesililerni élip kélishige birnerse dégili bolmaydighanliqini alahide tekitleydu. Amérikadiki musteqil analizchi ilshat hesen bu toghrisida pikir qilip: "Xitay hökümiti taki yéqinqi mezgillergiche mudhishqa tolghan lagérlarni 'kespiy terbiyelesh merkizi' dégen chirayliq namda atighan idi. Emdilikte yéngidin nam qoyulghan bu mekteplerning bu xildiki Uyghur jem'iyitini 'qayta qurush' qurulushigha qandaq xizmet qilishigha birnerse dégili bolmaydu" dédi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet