Qeshqerde oghlining ölüm sewebini sürüshtürgen Uyghur oqutquchi teqib astida élin'ghan

Qeshqer shehiride 2016‏-yili 8‏-ayda tutqun qilinip, “Soraq jeryani” da ölüp ketken 26 yashliq oghlining ölüsh sewebini sürüshtürgen bir Uyghur oqutquchining teqib astigha élin'ghanliqi ilgiri sürüldi.

Féysbukta élan qilin'ghan bu heqtiki uchurdin melum bolushiche, qeshqer shehiride dem élishqa chiqqan yardemchi oqutquchi tursunjan yasinning aliy mektepni püttürüp kelgen oghli zahirjan 2016‏-yili 15‏-awghust küni qeshqer sheherlik dölet amanliq qoghdash etritining ikki xadimi teripidin tutup kétilgen. Zahirjan tursun eyni waqitta “Nopus jedwilini toshquzidighan ish bar” dégen seweb bilen élip kétilgen we ikki heptidin kéyin uning ölüm xewiri kelgen. 

Tursunjan yasinning ijtima'iy taratqularda élan qilin'ghan erzidin qarighanda, zahirjan tursun tutup kétilip bir heptidin kéyin uning anisi qeshqer sheherlik dölet amanliq qoghdash etritige oghlini izdep barghan we shu yerde yiqilip chüshüp qaza qilghan. Zahirjan tursunning anisi wapat bolup bir hepte ötkendin kéyin sheherlik dölet amanliq etritining xadimliri tursunjan yasinni izdep kélip, uning oghlining “Soraq jeryani” da ölgenlikini uqturghan.

Tursunjan yasinning erzide bayan qilinishiche, oghli tutqun qilin'ghandin kéyin u dölet amanliq qoghdash saqchisi turdihaji bilen körüshüp, “Oghlining qandaq jinayet ötküzgenliki” ni sorighan. Turdihaji “Héchqandaq jinayiti yoq” liqini bildürüp, “Peqet tekshürüwatimiz” dep jawab bergen iken. Lékin da'iriler 30‏-awghust küni tursunjan yasinni tuyuqsiz sheherlik 1‏-doxturxanigha élip bérip, oghlining “Soraq jeryani” da ölgenlikini uqturghan. Da'iriler yene jesetni a'ilisidikilerge bermeydighanliqini, biraq “Insanperwerlik” ni közde tutup, uning oghlini körüwélishigha yol qoyulidighanliqini bildürgen. Lékin tursunjan yasin qeshqer sheherlik j x idarisining jawab bérishini telep qilip erz sun'ghan. U erzide oghlining qandaq “Jinayet” sadir qilghanliqi, jeset tekshürüsh doklatining néme üchün özige körsitilmigenliki, sotning mehkimisining qarari yoq turup, oghlining jesiti néme üchün a'ilisige bérilmigenlikige jawab bérishni telep qilghan. 

Uyghur kishilik hoquq teshkilatlirining ilgiri sürüshiche, bu weqe Uyghurlarning négizlik kishilik hoquqining qanchilik depsende qiliniwatqanliqi we shexsi bixeterlikining qanchilik éghir xewpke uchrawatqanliqini körsitip béridiken.