Моңғул паалийәтчиси хада б д т ға мураҗиәт қилди

Мухбиримиз меһрибан
2015-03-03
Share

Түрмидин қоюп берилгәндин кейинму ички моңғулниң көкхот шәһиридики өйигә нәзәрбәнд қилинған моңғул кишилик һоқуқ паалийәтчиси хада әпәнди 3-март күни әркин асия радиоси арқилиқ бирләшкән дөләтләр тәшкилатиниң кишилик һоқуқ комитетиға мураҗиәт қилди.

Хада әпәнди мураҗиитидә; "бүгүн 3-март җуңгода мәмликәтлик сиясий кеңәш йиғини башланди. Өгүнлүккә мәмликәтлик хәлқ қурултийи ечилмақчи. Мән силәрниң радио бөлүмиңларға язған хетим арқилиқ, бирләшкән дөләтләр тәшкилати кишилик һоқуқ комитетиниң җуңго һөкүмити билән сөзлишип, ички моңғул сақчи назарити тәрипидин тоңлитиветилгән аилимизниң банка һесабати мәсилисини оттуриға қоюшини тәләп қилимән. Чүнки бултур 12-айда 19 йиллиқ қамақтин қоюп берилип өйгә қайтурулған болсамму, әмма өйгә нәзәрбәнд қилиндим. 15 Йилға қошулған 4 йиллиқ түрмә һаятидики қийнақ дәстидин еғир кесәлгә гириптар болдум, давалинишқа имканим йоқ, аялим вә оғлум ачқан китабхана тақиветилип банка һесабатимиз тоңлитилди. Һазир бир аилә кишилириниң тамақ йейишиму җиддий мәсилигә айланди", дәп язған.

Радиомиз хитай бөлүминиң зияритини қобул қилған хада әпәнди, б д т кишилик һоқуқ комитети қатарлиқ мунасивәтлик тәшкилатлириниң у йоллиған мураҗиәткә җиддий қаришини өтүнүп, "әгәр бирләшкән дөләтләр тәшкилати дәрһал тәдбир қолланмиса, биз бир аилә кишилири тиләмчилик билән күн кәчүрүшкә мәҗбур болимиз" дегән.

Хитайда сиясий мәһбусларға қарита иқтисадий җәһәттинму җазалаш тәдбирини омумлашқан. Бултур 23-сентәбир даириләр тәрипидин муддәтсиз қамақ җазасиға һөкүм қилинған уйғур зиялийси илһам тохти әпәндиниңму банка һесаби вә униң намидики өй-мүлки тоңлитилғанлиқи җакарлинип, униң аяли гүзәлнур ханим бейҗиңда 3000 сомға йәтмигән хәлқ пули мааши билән икки оғлини беқишқа мәҗбур болмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт