Mongghul pa'aliyetchisi xada b d t gha muraji'et qildi

Muxbirimiz méhriban
2015-03-03
Share

Türmidin qoyup bérilgendin kéyinmu ichki mongghulning kökxot shehiridiki öyige nezerbend qilin'ghan mongghul kishilik hoquq pa'aliyetchisi xada ependi 3-mart küni erkin asiya radi'osi arqiliq birleshken döletler teshkilatining kishilik hoquq komitétigha muraji'et qildi.

Xada ependi muraji'itide؛ "Bügün 3-mart junggoda memliketlik siyasiy kéngesh yighini bashlandi. Ögünlükke memliketlik xelq qurultiyi échilmaqchi. Men silerning radi'o bölüminglargha yazghan xétim arqiliq, birleshken döletler teshkilati kishilik hoquq komitétining junggo hökümiti bilen sözliship, ichki mongghul saqchi nazariti teripidin tonglitiwétilgen a'ilimizning banka hésabati mesilisini otturigha qoyushini telep qilimen. Chünki bultur 12-ayda 19 yilliq qamaqtin qoyup bérilip öyge qayturulghan bolsammu, emma öyge nezerbend qilindim. 15 Yilgha qoshulghan 4 yilliq türme hayatidiki qiynaq destidin éghir késelge giriptar boldum, dawalinishqa imkanim yoq, ayalim we oghlum achqan kitabxana taqiwétilip banka hésabatimiz tonglitildi. Hazir bir a'ile kishilirining tamaq yéyishimu jiddiy mesilige aylandi", dep yazghan.

Radi'omiz xitay bölümining ziyaritini qobul qilghan xada ependi, b d t kishilik hoquq komitéti qatarliq munasiwetlik teshkilatlirining u yollighan muraji'etke jiddiy qarishini ötünüp, "Eger birleshken döletler teshkilati derhal tedbir qollanmisa, biz bir a'ile kishiliri tilemchilik bilen kün kechürüshke mejbur bolimiz" dégen.

Xitayda siyasiy mehbuslargha qarita iqtisadiy jehettinmu jazalash tedbirini omumlashqan. Bultur 23-séntebir da'iriler teripidin muddetsiz qamaq jazasigha höküm qilin'ghan Uyghur ziyaliysi ilham toxti ependiningmu banka hésabi we uning namidiki öy-mülki tonglitilghanliqi jakarlinip, uning ayali güzelnur xanim béyjingda 3000 somgha yetmigen xelq puli ma'ashi bilen ikki oghlini béqishqa mejbur bolmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet