Soniy willyams: "Uyghurlarni qiriwatqan xitayning olimpik ötküzüsh salahiyiti yoq!"

Muxbirimiz eziz
2021-03-16
Share

Xitay hökümitining Uyghurlarni milyonlap lagérlargha qamishidin bashlan'ghan zor tutqun we siyasiy basturush herkitining tipik qirghinchiliq ikenliki heqqidiki uchurlar keng tarqalghandin kéyin, her sahening qollap-quwwetlishige érishmekte. Awstraliye döletlik zeytun top komandisining sabiq topchisi, yéngi zéllandiyelik tenherketchi soniy bil williyams yéqinda xitay hökümitining Uyghurlarni qirghin qiliwatqanliqini keskin tenqidlep, béyjingda ötküzülmekchi bolghan 2022-yilliq qishliq olimpik musabiqisini bayqut qilish chaqiriqini otturigha qoyghan.

En'gliyediki "Kündilik pochta" gézitining 14-marttiki xewiride éytilishiche, soni willyams ilgiri ikki qétim dunya chémpyoni bolghan komanda ezasi süpitide chémpyonluq médali alghan bolup, yéqinde éghir derijilikler boyiche kespiy bokischiliqqa qiziqip qélip zeytun top sahesidin chékin'gen. U hazirghiche jem'iy yette meydan musabiqige chüshken bolup, téxi yéngilip baqmighan iken. Xewerde éytilishiche, u ötken hepte "Yéngi léniye aqillar merkizi" élan qilghan Uyghur qirghinchiliqi heqqidiki mexsus doklatni körgendin kéyin bekmu ghezeplen'gen. Buning bilen u tenterbiye sahesidikilerni 2022-yilliq béyjing qishliq olimpik musabiqisini bayqut qilishqa dewet qilghan. U yene 21-esirde érqiy qirghinchiliqning yéngiwashtin otturigha chiqishini tosushta hemme insanning bir kishilik mejburiyiti barliqini tekitligen. U bu heqte muxbirlargha bayanat élan qilip: "Uyghurlarning qirghin qilinishi, yehudiylarning eyni waqitta lagérlarda qirghin qilinishining eyni yosundiki tekrarlinishi boluwatidu. Shundaq bolghaniken, musabiqini bayqut qilish peqet ishning bashlinishi xalas," dégen.

Melum bolushiche, bu yil 35 yashqa kirgen soniy willyams 2008-yili islam dinini qobul qilip musulman bolghan iken. U hazirghiche izchil halda dunyaning herqaysi jaylirida yüz bériwatqan zulumlar heqqide köp qétimlap aktip pa'aliyetlerde bolghan iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet