En'gliye tashqi ishlar ministiri béyjing qishliq olimpik musabiqisige barmasliqi mumkinlikini bildürgen

Muxbirimiz erkin
2021-07-30
Share

En'gliye tashqi ishlar ministiri dominik rab ‍özining 2022-yilliq béyjing qishliq olimpik musabiqisige barmasliqi mumkinliki, Uyghur éli weziyiti toghrisida zor sezgürlük barliqini bildürgen. Közetküchilerning éytishiche, dominik rabning sözi xelq'arada Uyghurlargha "Irqiy qirghinchiliq" qilish bilen eyibliniwatqan xitayning sahibxaniliqidiki qishliq olimpikni bayqut qilish chaqiriqi künséri küchiyiwatqan bir waqitta, bashqilargha yol échishi mumkin bolghan bir signal ‍iken.

Roytérs agéntliqining xewer qilishiche, dominik rab 29-iyul en'gliye "Sky" (asman) téléwiziyesining béyjing qishliq olimpikige qatnishidighan-qatnashmaydighanliqi heqqidiki so'aligha "Buning mumkinchiliki gumanliq" dep jawab bergen hem "Méningche bérishim mumkindek qilmaydu" dégen. Biraq u yene en'gliye tenterbiyeni bek siyasiylashturushni xalimaydighanliqi, tenterbiye musabiqisige qatnishishni ‍en'gliyediki siyasetchiler qarar qilmasliqi kéreklikini éytqan.

U yene mundaq dégen: "Elwette, shinjanggha alaqidar we shuninggha oxshash mesililerde zor sezgürlük bar. Bizning siyasiy-diplomatik jehettiki wekillik derijimizni waqti kelgende qarar qilimiz".

Buning aldida amérika dölet mejlisining partiye halqighan bir guruppa ezasi xelq'ara olimpik komitétining prézidéntigha xet yézip, béyjing qishliq olimpikini kéchiktürüshni, eger xitay Uyghurlargha "Irqiy qirghinchiliq" qilishni toxtatmisa, bashqa döletke yötkeshni telep qilghan. Lékin xelq'ara olimpik komitéti bu heptining bashliri radiyomizgha bergen bayanatida, qishliq olimpikni bashqa döletke yötkesh "Mumkin emesliki" ni bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet