Olsi yazijining albaniyediki xizmitini ayaghlashturushqa mejbur bolushi diqqet qozghidi

Muxbirimiz irade
2019.12.11

Xitay hökümitining Uyghur élidiki lagérlargha a'it teshwiqatlirining ich mahiyitini ashkarilash we emeliyetni otturigha chiqirishta zor rol oynighan kanada puqrasi olsi yazijining albaniyediki xizmitini ayaghlashturushqa mejbur bolushi diqqet qozghidi.

Kanadada chiqidighan “Dölet pochtisi” gézitining xewer qilishiche, tarix penliri oqutquchisi doktor olsi yaziji 4 yildin béri özining esli yurti bolghan albaniyediki bir uniwérsitétta ders bérip kéliwatqan iken. Biraq bu uniwérsitét yéqinda olsi yazijigha uniwérsitétning uning bilen tüzgen kélishimni yéngilimaydighanliqi, bu sewebtin uning uniwérsitétta dawamliq ders bérelmeydighanliqini uqturghan.

Olsi yaziji “Dölet pochtisi” gézitige qilghan sözide bu uniwérsitétning qararida xitay hökümitining qoli bar dep qaraydighanliqini bildürgen. U “Gerche qolumda éniq pakit bolmisimu, emma xitayning albaniyediki tesir küchini qollinip, mendin öch almaqchi boluwatqanliqi éniq. Chünki bu uniwérsitétning méning ders ötüshümni ret qilidighan héchqandaq sewebi yoq” dégen.

Uning éytishiche, mezkur uniwérsitétning réktori sinila sotirofski olsi yazijigha “Bu qararning yuqiri orunlardin kelgenlikini” éytqan. Biraq u “Dölet pochtisi” gézitining bu heqtiki so'allirigha jawab qayturmighan. Xitayning “Yer shari waqit géziti” qatarliq hökümet axbaratlirimu yéqindin buyan olsi yazijigha hujum qilishni kücheytip, uni “Yalghan xewer tarqitish” bilen eyibligen idi.

Olsi yaziji Uyghur élidiki “Kespiy maharet bilen terbiyelesh” dep atalghan orunlarni ziyaret qilish üchün xitay teripidin teklip qilip apirilghan kishi. Eslide amérikaning bu orunlar heqqidiki bayanlirini ret qilish meqsiti bilen ziyaretke barghan olsi yazijining köz qarishi u yerge barghandin kéyin pütünley özgergen. U, yutub qatarliq ijtima'iy alaqe wasitiliride bu terbiyelesh orunlirining mahiyitini keng ashkarilap, xitayning teshwiqatini buzushta halqiliq rol oynighan. Olsi yaziji xitayning özige qaratqan tenqidlirige tiwittirda qayturghan inkasida, özining Uyghur musulmanliri duch kéliwatqan bu zulumni ashkarilashtin hergiz toxtap qalmaydighanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.