Xelq'ara kechürüm teshkilati xitayning Uyghur élidiki ölüm jazalirigha a'it sanliq melumatlarni ashkarilimighanliqini bildürdi

Muxbirimiz irade
2018-04-12
Share

Xelq'ara kechürüm teshkilati Uyghur élida ijra qiliniwatqan ölüm jazalirigha a'it sanliq melumatlarning ashkarilanmasliqi küchlük endishe peyda qilmaqta, dédi.

Xelq'ara kechürüm teshkilati bu sözni 12-aprél peyshenbe küni élan qilghan dunya miqyasidiki ölüm jazaliri heqqide chiqarghan yilliq doklatida qilghan. Xitay bu yilliq doklattimu ilgiriki yillargha oxshashla dunyadiki ölüm jazasi eng köp ijra qilinidighan dölet bolup bahalan'ghan.

Doklatning xitaygha a'it qismida körsitilishiche, xitayda ijra qiliniwatqan ölüm jazaliri “Dölet mexpiyetliki” dep qaralghanliqtin xitay da'iriliri emeliy reqemni yoshurup kelgen. Emma xitay sot tarmaqlirining tor betlirige qoyulghan bezi arxiplar we axbarat xewerliri xitayda 2017-yili ichide yene minglighan kishilerge ölüm jazasi bérilgenliki we ijra qilin'ghanliqini körsetmektiken.

Biraq, xelq'ara kechürüm teshkilati özining doklatida Uyghur élidiki ölüm jazasi mesilisining özliride küchlük endishe peyda qilghanliqini eskertken. Ularning qarishiche, Uyghur élida ötken bir yil ichide bixeterlik tedbirliri hessilep kücheytilgen hem shundaqla “Qattiq zerbe bérish”, “Térrorluqqa qarshi xelq turushi” qatarliq heriketler küchlük yosunda dawam qilghan turuqluq ölüm jazasi bérilgenlerge a'it héchqandaq bir xewer yaki reqem élan qilinmighan. Xitay aliy sotining tor bétide ölüm jazasi bérilgen peqet birla déloning xatirisi tépilghan.

Xelq'ara kechürüm teshkilati doklatida yene xitayning Uyghur élida ölüm jazalirini kengri yolgha qoyup kelgenlikini nezerde tutqanda 2017-yiligha a'it héchqandaq bir sanliq melumat tépilmasliqi ularning diqqitini qozghighan. Doklatta xelq'aradiki közetküchilerning Uyghur élida ijra qiliniwatqan ölüm jazalirini qanuniy tertiplerge uyghun bolmasliq, adil bolmasliq bilen eyibleydighanliqimu eskertilgen.

Xelq'ara kechürüm teshkilati doklat arqiliq xitay hökümitini ölüm jazalirigha a'it melumatlarni ammigha échiwétishke we qanuniy tertiplerning ochuq-ashkariliqigha kapaletlik qilishqa chaqirghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet