Паалийәтчи өмәр уйғур, пакистан сақчилири тәрипидин тутуп кетилди, 32 саәттин бери из-дерәксиз

Мухбиримиз шөһрәт һошур
2017-10-18
Share

Пакистанда яшаватқан уйғурлардин бири бүгүн радийомизға учур йоллап, пакистандики уйғур паалийәтчи өмәр уйғурниң сәйшәнбә күни чүштин кейин саәт 1 дә ишләватқан орнидин тутуп кетилгәнлики вә нәдилики һәққидә һазирғичә һечқандақ учур йоқлуқини мәлум қилди.

Бу йип учиға асасән пакистандики уйғур җамаитидин әһвал ениқлишимиз давамида, өмәрҗан билән бир күндә равалпиндики уйғур паалийәтчи абдуқеюм шәмшидинниң; униңдин бир күн аввал равалпиндиниң хитай маллири базиридики сода-санаәтчиләр бирләшмисиниң башлиқи, уйғур тиҗарәтчи абдуғениниңму тутуп кетилгәнлики вә пакистан сақчилириниң йәнә бәзи уйғурларни издәватқанлиқи ашкариланди.

Өмәр уйғурниң равалпиндики аилә-тавабиати, өмәрниң түнүгүн әтигәндә ишқа кәткәндин кейин һазирғичә қайтип кәлмигәнлики вә нәдилики һәққидә һечқандақ учур йоқлуқини вә аилә әзалириниң әндишә ичидә икәнликини баян қилди.

Өмәр уйғур өткән айниң 22‏-күни вә 25‏-күнлири пакистан истиғбарати тәрипидин бир қетим тутуп кетилгән вә бир қетим чақиртилған болуп, 4-5 саәттин сорақ қилинған. Өмәр уйғурниң шу вақтида радийомизға мәлум қилишичә, у сорақ җәрянида өмәр уйғур вәхпини тақаш һәққидә агаһландурулған. Пакистан мәхпий сақчилири униңдин дуня уйғур қурултийи билән уйғур вәзийити һәққидә мақалә язған бир һиндистанлиқ мухбир һәққидә мәлумат сориған.

Өмәр уйғур қатарлиқ үч нәпәр уйғурниң 19‏-қурултай һарписида тутқун қилиниши, пакистандики уйғур җамаитини әндишигә салмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт