Gérmaniye kishilik hoquq teshkilati ottura asiya döletlirining Uyghur mesilisige köz yumghanliqini tenqid qildi

Muxbirimiz erkin
2018-06-11
Élxet
Pikir
Share
Print

Gérmaniyediki "Tehdit astidiki xelqler jem'iyiti" bayanat élan qilip, shangxey hemkarliq teshkilatigha eza döletlerni xitayning Uyghurlarning kishilik hoquqini éghir depsende qilishigha köz yumush bilen tenqid qildi.

"Tehdit astidiki xelqler jem'iyiti" mezkur teshkilatning chingdawda ötküzülgen bashliqlar yighini munasiwiti bilen élan qilghan bayanatida, eza döletlerning xitaydiki éghir kishilik hoquq depsendichilikige tutqun pozitsiyesini tenqidlep, qazaqistanning Uyghur rayonidiki qazaqlarning jazalinishini toxtitishqa érensiz mu'amile qiliwatqanliqi, ottura asiyadiki jumhuriyetler Uyghurlarning kishilik hoquqining qattiq depsende qilinishigha, pakistanning afghan musapirlirini keng kölemlik qoghlap chiqirishigha köz yumuwatqanliqini ilgiri sürgen.

Shangxey hemkarliq teshkilatining bashliqlar yighini 9 we 10-iyun künliri xitayning chingdaw shehiride ötküzülgen. Xitay re'isi shi jinping yighinning yépilish murasimida qilghan sözide yene "3 Xil küchler" ge zerbe bérishni tekitlep, yighinning "Térrorluq" qa we "Esebiylik" ke qarshi küresh qilish ehdinamilirini estayidil ijra qilishni tekitligen.

Mezkur yighin xitay hökümiti bir milyondek Uyghurni yighiwélish lagérlirigha solap, amérika bashchiliqidiki gherb dunyasining diqqitini qozghighan mezgilde chaqirilghan idi.

"Tehdit astidiki xelqler jem'iyiti" bayanatida agahlandurup, "Herqandaq bireylen kishilik hoquq mesilisini hel qilishning ornigha süküt qilishni yolni tutsa, bu hergiz bixeterlikni téximu yaxshilimaydu, belki téximu ilgirilep toqunush peyda qilidu" dégen. Bayanatta yene, gerche ottura asiya döletliride nurghun Uyghurlar yashisimu we ular xitayning musulman milletlerni jazalishidin endishe qiliwatqan bolsimu, biraq bu hökümetlerning xitayni tenqid qilmaywatqanliqini eyibligen.

Toluq bet