Өзбәкләр билән таҗиклар арисидики 18 йиллиқ соғуқчилиқ еришкә башлиди

Мухбиримиз үмидвар
2018-03-11
Share

Оттура асияниң кона диктатори дәп тәнқид қилинған мәрһум өзбекистан президенти ислам кәримоф 18 йил зиярәт қилмиған шуниңдәк даим соғуқ муамилә қилған таҗикистанға йеңи президент шавкәт мирзийойеф қәдәм тәшрип қилип, икки дөләт арисида бирақла 30 ға йеқин һәр хил келишимләрниң имзалинишини ишқа ашурған.

Шавкәт мирзийойеф 9-март күни таҗикистан пайтәхти дүшәнбигә йетип келип өз рәсмий зияритини башлиған болуп, уни таҗикистан президенти имамәли рахман вә һөкүмәтниң башқа юқири дәриҗилик рәһбәрлири биваситә айропортқа чиқип қарши алған. Таҗикистан тәрәп мирзийойефни әң юқири қизғинлиқта күтүвалған болуп 12 миң нәпәр оттура мәктәп вә алий мәктәп оқуғучиси қоллирида өзбекистан байриқини көтүрүп, йол үстидә қатар туруп уни қарши алған.

Оттура асия хәвәр агентлиқиниң учурлиридин мәлум болушичә, икки тәрәп өз дөләт мунасивәтлирини бирақла истратегийилик шериклик дәриҗисигә көтүргән шуниңдәк йәнә икки дөләт арисида 30 күн визисиз берип-келиш йолға қойидиғанлиқини җакарлиған. Нәтиҗидә, йиллардин буян тақап қоюлған өзбек-таҗик чеграсидики 9 өткәл ечиветилгән. 

Ислам кәримоф 2000-йили бир қетим таҗикистанни зиярәт қилған вә имамәли рахманму бир қетим өзбекистанни зиярәт қилғандин кейин мәзкур икки оттура асия дөлити арисидики алий дәриҗиликләр зиярити тохтиған шуниңдәк мунасивәтлириму начарлашқан. Һәтта таҗикистан русийәниң мәблиғи билән рогун су тосмисини ясап аму дәрясиниң сүйини боғидиғанлиқини елан қилип, өзбекистанға тәһдит салған. Буниң нәтиҗисидә ислам кәримоф оттура асияда су уруши партлайдиғанлиқини тәкитлигән иди.

Нөвәттә, мирзийойеф барлиқ қошнилар билән яхши өтүш һәм түркий җумһурийәтлири билән қериндашлиқни күчәйтиш шоари қоллиниватқанлиқи мәлум болмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт