Özbékistan maliye saheside chong tazilash élip bérilghan

Muxbirimiz ümidwar
2018-01-01
Share

Özbékistanda merhum prézidént islam kerimof dewridiki bir qisim emeldarlar arqimu-arqidin wezipisidin qaldurulup, ularning ornigha yéngi rehberler qoyuluwatqanliqi melum bolmaqta.

Prézidént shawket mirziyoyéf buyruqi boyiche ötken hepte özbékistanning pul-mu'amile we iqtisadi weziyiti bilen biwasite munasiwetlik organ-maliye ministirliqidiki bir qisim kona emeldarni öz ichige alghan 562 adem biraqla ishtin heydelgen.

Perghane xewer agéntliqining özbékistan menbeliridin neqil élishiche, 22-dékabir küni özbékistan maliye ministirliqigha kadirlarni tazilash buyruqi kélip, etisila ishtin boshitish bashlinip, ministirliq terkibidiki ikki asasiy bashliq we mu'awin bashliqlar bolup, 24 emeldar ishtin boshitilghan. Maliye ministirliqining her qaysi wilayetliridiki tarmaq organliridiki emeldarlar, kadirlar bolup, xizmitidin heydelgenler 562 ademge yetken. 

Prézidént mirziyoyéf uning aldida qilghan sözide "Biz 20 yildin artuq waqit maliye ministirliqidiki 'eqilliq kishiler' sewebidin xelqqe natoghra melumat berduq" dégen we emdi idare rehberlik ishlirida "Yashlar, qaysi millet bolushidin qet'iynezer wetenni soyidighan kishiler bolushi kérekliki" ni tekitligen idi. 

Özbékistan maliye ministirliqini 2005-2016-yilliri, prézidént kerimofning ishenchlik ademliridin rustem ezimof bashqurghan bolup, u kerimof ölgendin kéyin prézidéntliq ornini talashqan asasiy kishilerning biri dep qaralghan idi, emma u saylamgha qatnashmighan. U, 2016-yili, dékabirda wezipisidin qaldurulup, mu'awin bash ministirliq wezipisige qoyulup, 2017-yili buningdinmu boshitiwétilgen idi.

Perghane agéntliqining özbékistanning "Gazéta.Uz" uchur toridin neqil élishiche, prézidént mirziyoyéf yene özbékistan dölet bixeterlik idarisinimu islah qilidighanliqini bildürgen. Mezkur idare prézidént islam kerimof dewridiki emeldarlar teripidin bashquruluwatqan bolup, xelq'ara közetküchiler ilgiri, özbékistandiki kishilik hoquqqa dexli-teruz qilidighan tüzümide mezkur organning qoli barliqini eyibligen idi. 

Analizchilar shawket mirziyoyéf hakimiyetni qolgha alghan ikki yildin buyan prézidént islam kerimofning 26 yilliq hökümranliqi dewride chiriklik, mustebitlik kücheygen we iqtisadi jehettin arqida qalghan özbékistanning qoshna qazaqistan, qirghizistan, türkiye qatarliq türkiy jumhuriyetler bilen bolghan qérindashliq munasiwetlirini eslige keltürüsh, rusiye, xitay we gherb elliri bilen bolghan soda-iqtisadiy alaqilirini kücheytip, özbékistanning iqtisadi jehettin rawajlinishini qolgha keltürüsh üchün bir qatar pa'aliyetlerni élip bériwatqanliqini bildürüshmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet