Өзбекистанлиқлар өзбек өктичилириниң вәтинигә қайтишини күтмәктә

Мухбиримиз үмидвар
2018-03-04
Share

Өзбекистан президенти чәтәлләрдики өзбек өктичиләрниң вәтинигә қайтишиға рухсәт қилиши мумкинму? дегән соаллар диктаторлуқта әйибләнгән ислам кәримофниң өлүмидин кейинки йеңи президент шавкәт мирзийойеф башлиған ислаһатлар җәрянида оттуриға чиқмақта.

Америка авази өзбек бөлүминиң хәвәр қилишичә, йеқинда өзбекистан хәлқ язғучилири, шаирлири, даңлиқ әдәбиятчилири, җамаәтчилик вәкиллиридин болуп, 450 тин артуқ адәм имза қоюп, президент шавкәт мирзийойефқа 20 нәччә йиллардин буян чәтәлдә муһаҗирәттә яшаватқан атақлиқ өзбек шаири вә өктичи рәһбири муһәммәд салиһниң вәтинигә қайтишиға рухсәт қилиши һәққидики мураҗиәтнамини тапшурған.

Йеқинда болса, өзбекистанниң түркийәдики баш әлчиси түркийәдики мухалифәт өзбек тәшкилати “түркистан җәмийити” ниң рәис, муавин рәислиридин ибарәт бир гуруппа билән көрүшүп, сөһбәт өткүзгән һәмдә чәтәлләрдики өзбек өктичилириниң вәтинигә қайтиши мәсилисини муһакимә қилған. Әлвәттә, президент ислам кәримоф дәвридә чәтәлләрдики өзбекистан әлчиханилириниң өктичиләр билән көрүшүши мумкин әмәс иди.

Игилишимизчә, ислам кәримоф түзүмидин нарази болуп вә униң тәқиблишидин қутулуп чәтәлләрдә муһаҗирәттә яшап паалийәт қиливатқан өктичиләр түркийә, явропа әллири вә америкиға тарқалған болуп, муһәммәд салиһ қатарлиқларниң нами әйни вақитта өзбекистанда кәң тонулған иди.

Түркийә қатарлиқ әлләрдики өзбек өктичилириниң уйғурларниң сиясий дәва паалийәтлириниму изчил қоллап келиватқанлиқи мәлум.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт