Русийә: кәримофниң өлүми өзбекистан вә униң әтрапиниң вәзийитигә сәлбий тәсир көрсәтмәйду

Өзбекистан президенти ислам кәримофниң өлүмидин кейин өзбекистан вәзийитидә һечқандақ сәлбий әһвал көрүлмигәнлики вә президент кәримофниң өлүминиң вәзийәткә тәсир көрсәтмәйдиғанлиқи билдүрүлди.

Русийә хәвәрләр агентлиқиниң йезишичә мәзкур билдүрүшни русийә президентиниң афғанистан мәсилиси бойичә вәкили, русийә ташқи ишлар министирлиқиниң асия ишлири башқармисиниң башлиқи замир кабулуп ейтқан.

У, “мениңчә бу, өзбекистан вә униң әтрапиниң һәрбий сиясий вәзийитигә сәлбий тәсир көрсәтмәйду” дегән.

Униң ейтишичә, ислам кәримофниң вапатидин кейин, өзбекистандики вәзийәтниң начарлишидиғанлиқи вә әсәбий күчләрниң вәзийәтни муқимсизлаштуруши мумкинлики пәрәз қилинған иди. Әмма, һазирқи өзбекистан рәһбәрлики вәзийәтни контроллуқ астиға алди.

Мәлумки, 2-сентәбир күни өзбекистанни 27 йил идарә қилған ислам кәримоф өлгәндин кейин өзбекистанниң тәқдири һәққидә һәр хил қияслар оттуриға чиқишқа башлиған иди. Нөвәттә, бу дөләтни баш минситир шавкәт мирзайеф идарә қиливатқан болуп, 5- сентәбир күни русийә президенти путин сәмәрқәнткә келип, кәримофниң қәбрисини йоқлиған һәмдә шавкәт мирзайеф билән болған учришишта русийә билән өзбекистан мунасивәтлириниң техиму мустәһкәмлинидиғанлиқини билдүргән иди. Нөвәттә, шавкәт мирзайефниң русийә билән алаһидә йеқин һәмкарлиқ мунасивити орнитидиғанлиқи тәһлил қилинмақта. Өзбекистанда 4-декабир күни президент сайлими өткүзүлиду.

Пәрғанә ториниң хәвәр қилишичә, өзбекистандики йеңи бир чоң мәсчиткә ислам кәримофниң нами берилип, “ ислам ата мәсчити” дәп атилидиғанлиқи мәлум болған.