Азадлиқ радийоси: «немә үчүн өзбәкләр шунчә көп террорлуқ һуҗумлириға четилип қалиду»

Мухбиримиз қутлан
2017-11-04
Елхәт
Пикир
Share
Принт

29 яшлиқ өзбек яш сәйфулла сәипоф 31-өктәбир күни нюйоркта террорлуқ һуҗуми елип берип 8 адәмни өлтүргәндин кейин, дуняви таратқуларниң диққәт нуқтиси йәнә бир қетим мусулманлар дунясиға, болупму оттура асия әллиридә күнсайин күчийиватқан диний ашқунлуқ мәсилисигә мәркәзләшти.

Баш штаби прагадики «азадлиқ радийоси» 1-ноябир күни «немә үчүн өзбәкләр шунчә көп террорлуқ һуҗумлириға четилип қалиду» сәрләвһилик мақалә елан қилди. Мәзкур мақалида 2017-йили киргән кечиси истанбулдики рәйна кечилик кулубини қанға бойиған террорчиниң, бу йил 4-айниң башлирида санкт-петерборгдики метроға бомба қойғучиниң, униңдин бир һәптә өтүп стокһолм шәһәр мәркизидә йүк машиниси билән 4 адәмни бесип өлтүргүчиниң өзбек кимликигә бағлинидиғанлиқи санап өтүлгән.

Гәрчә бу йилниң ичидә йүз бәргән 4 қетимлиқ террорлуқ һуҗумини елип барғучиларниң өзбек болуши 30 милйонлуқ нопусқа игә өзбек хәлқини террорлуқ билән бағлиялмисиму, әмма көзәткүчиләр, илгири рус коммунизминиң 70 йиллиқ динсизлаштуруш асаритидә туруп кәлгән оттура асия дөләтлиридә йүз бериватқан бүгүнки кәскин өзгиришлиригә йеқиндин диққәт қилмақта. Немә үчүн өткән бир йил ичидә дуняни зилзилигә кәлтүргән 4 қетимлиқ террорлуқ һуҗумини елип барғучиларниң һәммиси өзбәкләргә бағлиниду?

Мәлумки, өзбәкләр сабиқ советлар иттипақи дәвридә пүткүл иттипақ тәвәсидә, җүмлидин оттура асия җумһурийәтлиридә өзиниң миллий тил-йезиқи, маарипи, әнәниси вә кимликини сақлашта әң көп тиркәшкән хәлқләрниң бири. Һалбуки, 1991-йили советлар иттипақи йиқилип, оттура асиядики иттипақдаш җумһурийәтләр мустәқиллиққа еришкәндин кейин, өзбекистан пүткүл оттура асия бойичә әң бекик, ташқи дуня билән болған алақиси үзүлгән, иқтисадий касатлашқан, авам хәлқниң диний етиқади вә әркин пикир қилиши тәқибләнгән мустәбит бир дөләткә айланған.

Илгирики өзбекистан компартийисиниң биринчи секретарлиқидин мустәқил өзбекистанниң тунҗи президентиға айланған ислам кәримоф, 1990-йилларниң ахирлиридин башлап өзбекистанда аста-аста күчийиватқан диний кәйпиятни қаттиқ бастурушқа башлиған. У, өз һакимийитигә келидиған әң чоң хәвпниң оттура асияда күнсайин күчийиватқан ислами гуруппилар вә диний қатламдин келидиғанлиқини һес қилип, «диний радикал», «ашқун унсур», «террорчи», «ваһаби» вә «ислам партийәсиниң әзаси» дегәндәк қалпақлар билән миңлиған өзбек яшлирини қамиған. Миңлиған өзбек яшлири йеңидин мустәқил болған вәтинидә әркин яшиялмай чәтәлләргә чиқип кетишкә мәҗбур болған. Русийә вә башқа дөләтләргә еқип берип әрзан әмгәк күчигә айланған өзбек яшлири арисида диний кәйпият барғансери күчәйгән.

Буниң билән мустәқиллиқтин кейин йетишип чиққан йеңи бир әвлад өзбек яшлирида өз вәтинидики мустәбит һакимийәтни чәкләштә ислам роһи вә сиясий идеологийәсигә тайиниш идийиси шәкилләнгән. 

«Азадлиқ радийоси» елан қилған мәзкур мақалидә оттура асиядики йеңи бир әвлад яшларниң ислами әқидә вә сиясий күчни оз дөләтлиридики мустәбит һакимийәткә қарши турушниң әң үнүмлүк йоли дәп қарайдиғанлиқи илгири сүрүлгән.

Пикирләр (0)
Share
Толуқ бәт