Xitaygha sétiwétilgen pakistanliq ayallar éghir xorlashqa duch kelmekte

Muxbirimiz eziz
2019-12-12
Élxet
Pikir
Share
Print

Birleshme xewer agéntliqining 12-dékabirdiki xewiride éytilishiche, xitaydiki bir qisim adem bédikliri pakistanning namrat rayonlirida yerlik qiz-chokanlarni xitaydiki "Baylargha xotun bolush" qa qiziqturmaqta iken. Xewerde éytilishiche, bu ayallar asasiy jehettin xiristiyan dinidikiler bolup, ularning beziliri emdila 15-16 yashqa kirgen gödek qizlar iken.

Ene shu xil ayallarning biri bolghan semiye dawut ikki ay ilgiri bir xitaygha xotunluqqa sétilghan. Béjirim we saghlam bolghan semiye birnechche hepte ilgiri chaqliq orunduqta pakistan'gha qaytip kelgen, shuningdek achliq, tayaq we bashqa xorlashlardin bir tére bir ustixan bolup qalghan hemde "Néme ish bolghanliqini sorimanglar" dep turuwalghan. Aridin bir hepte ötkende u shu teriqide jan üzgen.

Birleshme xewer agéntliqining tekshürüshige qarighanda bu xildiki ayallar xitayda ayrim öyge solap qoyush, jismaniy jehettin xorlash, pahishixanilargha sétilish, ach qoyup qiynash dégendek köp xil xorluqqa duchar bolidiken. Semiyening newre akisi bu toghriliq söz qilip "Biz bek namrat bolghachqa ashu kishiler qizlirini xitaylargha bérish arqiliq az-tola pulgha érishidu. Emma bu qizlarning xitayda qandaq teqdirge muptila boluwatqanliqini héchkim bilmeydu," dégen.

Xewerde éytilishiche, adem bédikliri tonushturghan atalmish "Xitay bay" lirining köpinchisi xitay ölkilirining chet yéza-qishlaqlardiki xotun alalmay yürgen namrat déhqanlar bolup, ashu xildiki ayallardin biri muxbirgha "Érimning yurtigha barghandin kéyin uning öyining yézining chétidiki ömüchük tori qaplighan bir kepe ikenlikini bildim," dégen.

Toluq bet